Իտալական առողջարանները դեռ մինչև ամառային պիկ սեզոնի մեկնարկը գերբեռնվել են զբոսաշրջիկներով․ հայտնի քաղաքների փողոցները բառացիորեն կաթվածահար են եղել հանգստացողների բազմությունից, իսկ տեղացիները բողոքում են, որ չեն կարողանում նորմալ տեղաշարժվել և նույնիսկ դուրս գալ սեփական տներից։

Սոցցանցերում արագ տարածվում են Պոզիտանոյից, Չինկվե Տեռեից և Հռոմից քաոսը պատկերող տեսանյութեր, որտեղ զբոսաշրջիկների հսկայական հոսքերը հեղեղել են նեղ փողոցները, աստիճանները, տրանսպորտի կանգառները և գլխավոր տեսարժան վայրերը։

Հատկապես ծանր իրավիճակ է նկատվում Ամալֆիի ափին գտնվող Պոզիտանոյում։ Կադրերում երևում է, թե ինչպես են հարյուրավոր մարդիկ դանդաղ առաջ շարժվում նեղ անցումներով՝ անընդհատ կանգ առնելով ծովի տեսարանով և հայտնի բազմագույն տներով լուսանկարներ անելու համար։

Տեղական խանութներն ու ռեստորանները նույնպես տուժում են մարդաշատությունից․ մուտքերը ամբողջությամբ արգելափակվում են զբոսաշրջիկների կողմից։

Հարևան Նոչերա Ինֆերիորե քաղաքի բնակիչ Անտոնիո Ատտիանեզեն քննադատել է տարածաշրջանի իշխանություններին։ «Ամալֆիի քաղաքապետերին և վարչակազմի ղեկավարներին դուր է գալիս այս քաոսը, հակառակ դեպքում նրանք վաղուց միջոցներ կձեռնարկեին այսպիսի զանգվածային զբոսաշրջության դեմ։ Սա շարունակվում է տարիներով, և իրավիճակը միայն վատթարանում է»։

Ոչ պակաս լարված իրավիճակ է ստեղծվել նաև Իտալական Ռիվիերայում գտնվող Չինկվե Տեռեում։ Զբոսաշրջիկները զանգվածաբար գրոհում են ավտոբուսներն ու գնացքները, երկար հերթեր են կազմում դեպի դիտակետեր։

Հռոմում սոցցանցերի օգտատերերն արդեն տեղի ունեցողը անվանում են «իսկական դժոխք»։ Տեսանյութերում երևում են բազմամետրանոց հերթեր Կոլիզեյի և այլ հայտնի վայրերի մոտ․ զբոսաշրջային հոսքերը ձգվում են ամբողջ փողոցներով։

Գլխավոր խնդիրներից մեկը տեղացիները համարում են այսպես կոչված «mordi e fuggi» («կերավ ու փախավ») զբոսաշրջությունը՝ մեկօրյա ուղևորությունները, երբ զբոսաշրջիկները գրեթե գումար չեն ծախսում տարածաշրջանում՝ գնելով միայն էժան հուշանվերներ, բայց միևնույն ժամանակ հսկայական ծանրաբեռնվածություն ստեղծելով ենթակառուցվածքների վրա։

Պոզիտանոյի նախկին քաղաքապետ Սալվատորե Գալյանոն տեղի ունեցողը համեմատել է «երրորդ աշխարհի երկրների տեսարանների» հետ։ Նրա խոսքով՝ հիմնական խնդիրը չափազանց նեղ ճանապարհներն են և զբոսաշրջիկների անկառավարելի հոսքը, հատկապես նրանց, ովքեր ժամանում են կրուիզային նավերով։ «Մենք պարզապես չենք կարողանում հաղթահարել մարդկանց այսքան մեծ քանակը։ Ամալֆիի ափի գեղեցկությունը քայքայվում է», — հայտարարել է նա։

Պոզիտանոն արդեն երկար տարիներ մնում է համաշխարհային հայտնիների սիրելի հանգստավայրերից մեկը, այդ թվում՝ Քայլի Ջենների, Բեյոնսեի, Ջեյ-Զիի, Ռիզ Ուիզերսփունի և Միք Ջագերի համար։

Ամենահայտնի վայրերից են Le Sirenuse հյուրանոցը և Da Adolfo լողափնյա ռեստորանը։

Օվերտուրիզմի խնդիրը այսօր ազդում է եվրոպական շատ քաղաքների վրա։ Բարսելոնայում տեղացիները պարբերաբար բողոքի ցույցերի են դուրս գալիս զբոսաշրջիկների հոսքի և Airbnb-ի պատճառով բնակարանի գների աճի դեմ։ 2024 թվականին այնտեղ ցուցարարների ժամանակ նույնիսկ ջրային ատրճանակներով ջուր էին ցողում զբոսաշրջիկների վրա։

Նմանատիպ խնդիրների բախվում են նաև Վենետիկը և Դուբրովնիկը, որտեղ «Գահերի խաղը» սերիալի նկարահանումներից հետո ճանապարհորդների հոսքն ու տեղացիների կյանքի արժեքը կտրուկ աճել են։

Source: https://news.am/hy/news/1036633