Թալիբները տղամարդկանց թույլատրել են ամուսնանալ իննամյա աղջիկների հետ

Աֆղանստանում «Թալիբան» շարժումը չեղարկել է աղջիկների ամուսնության նվազագույն տարիքային շեմը, հայտնում է The Times-ը։

«Եթե աղջիկը սեռահասունության է հասնում ինը կամ տասը տարեկանում, ապա, ըստ նոր օրենքի, նա համարվում է ամուսնության համար արժանի թեկնածու», — լրագրողներին հայտնել է աֆղան իրավապաշտպան Հորիա Մոսադիկը։

Մինչ թալիբների իշխանության գալը, Աֆղանստանում ամուսնության նվազագույն տարիքը 16-ն էր, սակայն այժմ այդ սահմանափակումը հանվել է։

Լրագրողները նաև հիշեցնում են, որ ըստ սուննի իսլամական իրավունքի ամենախոշոր և հնագույն դպրոցի՝ սեռահասունության նվազագույն տարիքը համարվում է ինը տարեկանը։

«Թալիբան» շարժման գերագույն առաջնորդ Հայբաթուլլա Ախունձադան ավելի վաղ հայտարարել էր, թե թալիբների վարչակարգն աֆղան կանանց ազատել է «ավանդական ճնշումներից» և վերադարձրել նրանց «ազատ մարդու» կարգավիճակը։ Միևնույն ժամանակ շեշտվում է, որ նոր իշխանությունները ձեռնարկել են «անհրաժեշտ քայլերը՝ կանանց համար իսլամական շարիաթին համապատասխան հարմարավետ ու բարեկեցիկ կյանք ապահովելու համար», իսկ կանանց նախկին խնդիրները կապվում են ամերիկյան 20-ամյա օկուպացիայի հետ։

Source: https://news.am/hy/news/1037221