Ռուսաստանի Քննչական կոմիտեն խուզարկություններ է անցկացրել ՌԴ ԳԱ Փիլիսոփայության ինստիտուտում և նրա աշխատակիցների բնակության վայրերում, T-invariant պարբերականին հայտնել են իրազեկ աղբյուրները։ Նրանց տվյալներով՝ հարցաքննության է տարվել շուրջ տասը գիտնական, այդ թվում՝ ինստիտուտի տնօրենի ժամանակավոր պաշտոնակատար, ՌԴ ԳԱ 87-ամյա ակադեմիկոս Աբդուսալամ Հուսեյնովը։ Հարցաքննությունից հետո մեծ մասին բաց են թողել չբացակայելու մասին ստորագրությամբ։ Միաժամանակ, ինստիտուտի ավագ գիտաշխատող, փիլիսոփայական գիտությունների թեկնածու Սվետլանա Մեսյացին մեղադրանք է առաջադրվել առանձնապես խոշոր չափերով խարդախության հոդվածով (ՔՕ 159-րդ հոդվածի 4-րդ մաս)։ Մոսկվայի Տվերյան շրջանային դատարանը ՆԳՆ քննիչի միջնորդությամբ փիլիսոփային տնային կալանքի տակ է վերցրել, РБК-ին պատմել են իրավիճակին ծանոթ աղբյուրները։

Նրանց խոսքով՝ քննությունը կարծում է, որ «Արիստոտելի ժառանգությունը» գիտական նախագծի իրականացման ընթացքում, որը 2018–2024 թվականներին ֆինանսավորվել է բյուջետային միջոցների հաշվին, հաշվետու փաստաթղթերում կարող էին ներառված լինել աշխատանքների կատարման մասին ոչ հավաստի տեղեկություններ։ Նախագիծը ենթադրում էր Արիստոտելի ստեղծագործությունների ամբողջական ակադեմիական ժողովածուի պատրաստում ռուսերենով, այդ թվում՝ նախկինում չհրապարակված տրակտատների թարգմանություն, պատմափիլիսոփայական մեկնաբանությունների մշակում և անտիկ արիստոտելյան ավանդույթի ուսումնասիրություն։ Սակայն, ըստ քննության վարկածի, հայտարարված արդյունքների մի մասը փաստացի բացակայել է կամ գոյություն է ունեցել միայն սևագիր ու անավարտ նյութերի տեսքով։ Ստուգումը նաև բացահայտել է գիտական աշխատանքի ծավալների հնարավոր ուռճացում և հաշվետվության մեջ ավելի վաղ պատրաստված կամ արդեն հրապարակված ուսումնասիրություններից փոխառված տեքստերի ներառում։

РБК աղբյուրները խուզարկություններն ու Մեսյացի ձերբակալությունը կապել են ինստիտուտի նախկին ղեկավար Անատոլի Չեռնյաևի գործունեության հետ։ Նրանց խոսքով՝ նա դիմել էր իրավապահ մարմիններին՝ ինստիտուտին դրամաշնորհներ հատկացնելու վերաբերյալ հայտարարություններով։ Գիտության և բարձրագույն կրթության նախարարությունը Չեռնյաևին նշանակել էր ինստիտուտի ղեկավարի ժամանակավոր պաշտոնակատար 2021 թվականի դեկտեմբերին, սակայն երկու շաբաթ անց որոշումը չեղարկվել էր աշխատակիցների բողոքի պատճառով։ Գիտնականն ակտիվորեն աջակցում էր Ուկրաինայի դեմ պատերազմին և ՌԴ ԳԱ փիլիսոփաների մեջ առաջինն էր այցելել օկուպացված շրջաններ՝ մասնակցելու «Փիլիսոփայությունը ճակատային գծում․ հիբրիդային պատերազմները և դրանց վերափոխումները XXI դարում» համաժողովին։

Ի պաշտպանություն Չեռնյաևի՝ ՌԴ ԳԱ Փիլիսոփայության ինստիտուտի աշխատակիցների հետ վեճում, հանդես էին եկել փիլիսոփա Ալեքսանդր Դուգինը և «Արդար Ռուսաստան» կուսակցության ղեկավար Սերգեյ Միրոնովը։ Վերջինս խոստացել էր դիմել գլխավոր դատախազ Իգոր Կրասնովին և գիտության ու բարձրագույն կրթության նախարար Վալերի Ֆալկովին՝ խնդրելով ստուգել Չեռնյաևի ազատման օրինականությունը։

Source: https://news.am/hy/news/1037557