Արցախի կորուստը դարձավ մեր ազգային արժանապատվության կորուստը, սակայն այս պատմությունը դեռ ավարտված չէ, քանի դեռ կենդանի է յուրաքանչյուր հայի հիշողությունն ու պատասխանատվությունը. ArtsakhTV-ի հետ զրույցում հայտարարել է «Ուժեղ Հայաստան» կուսակցությունների դաշինքի առաջնորդ Սամվել Կարապետյանը։

Կարապետյանը հիշել է, թե ինչպես առաջին անգամ բացահայտեց այդ երկրամասը մոտ 12 տարի առաջ՝ Բակո Սահակյանի հրավերով, այնտեղ հիվանդանոց կառուցելու նպատակով։ Կարապետյանը խոստովանել է, որ Արցախ է այցելել ընդամենը չորս անգամ, սակայն յուրաքանչյուր այց անջնջելի տպավորություններ է թողել, իսկ տեղի բնակիչների հյուրընկալությունն ու Շուշիի մերձակա անտառում «Արցախի ձայներ» մանկական համույթի հետ անցկացրած երեկոն անմոռանալի են դարձել։ Նրա խոսքով՝ ինքը միշտ անկեղծորեն հիացել է արցախցիների ինտելեկտով և Արցախի բնությամբ։

Խոսելով լայնամասշտաբ բարեգործական նախագծերի մասին՝ Սամվել Կարապետյանն ընդգծել է, որ իր գործողությունները երբեք բիզնես-հաշվարկ չեն եղել։

«Ես ներդրումներ եմ արել Արցախում՝ ժողովրդին օգնելու, այլ ոչ թե գումար վաստակելու համար»,- նշել է քաղաքական գործիչը՝ հիշեցնելով, որ ժամանակին ամբողջությամբ ֆինանսավորել է տեղական էներգահամակարգի արդիականացումը և նոր էլեկտրացանցերի կառուցումը, երբ պարզվել էր, որ ամբողջ տարածաշրջանի էներգամատակարարումը կախված էր մեկ միակ հենասյունից։ Նա հավելել է նաև, որ միշտ արձագանքել է հանրապետության ղեկավարության ցանկացած խնդրանքի և մեկնարկել ծրագրեր՝ ուղղված ժողովրդագրական իրավիճակի բարելավմանը։

Ամենացավալի հիշողությունը նա անվանել է երկրորդ հայրենիքի կորուստը, որը տեղի է ունեցել «անմիտ կերպով այն պատճառով, որ մի փոքրիկ խմբավորում չէր հասկանում Արցախի նշանակությունը համայն հայության համար»։ Սամվել Կարապետյանը խորին ափսոսանք է հայտնել, որ ազգին չի հաջողվել համախմբվել Արցախի պաշտպանության համար, և խոստովանել, որ անգամ իր երևակայության մեջ չէր կարող ծագել հայ բնակչությունից ամբողջությամբ դատարկված Ղարաբաղի մասին միտքն անգամ։

Քաղաքական գործիչը խիստ քննադատության է ենթարկել Հայաստանի գործող իշխանություններին՝ կատարվածի համար պատասխանատվություն կրել չցանկանալու համար, սակայն համոզմունք է հայտնել, որ շուտով կսկսվի վերածննդի փուլը։ Որպես առաջնահերթ քայլ՝ Կարապետյանն առանձնացրել է բռնի տեղահանված արցախցիների անձնագրերի հարցի լուծումը։ Նա ընդգծել է, որ իշխանության գալու պարագայում կանի ամեն ինչ, որպեսզի նրանք անհապաղ դառնան Հայաստանի Հանրապետության լիիրավ քաղաքացիներ և իրենց ոտնահարված չզգան։

Source: https://news.am/hy/news/1038864