Մարոկկոյում շենք է փլուզվել. կան զոհեր

Մարոկկոյի Ֆես քաղաքում, որը գտնվում է Ռաբաթից մոտ 200 կիլոմետր դեպի արևելք, չորսհարկանի շենքի փլուզման հետևանքով առնվազն չորս մարդ է զոհվել, ևս վեցը՝ վիրավորվել, հաղորդում է Reuters-ը։

Պետական 2M լրատվամիջոցը հայտնել էր, որ զոհվել է 11 մարդ, նախքան պաշտոնական տեղեկությունը հրապարակելը։

Իշխանությունները հայտնել են, որ շարունակվում են մյուս մարդկանց որոնումները, որոնք դեռ կարող են գտնվել փլատակներում։

Իշխանությունների հաղորդմամբ՝ միջադեպի առթիվ հետաքննություն է սկսվել, իսկ հարևան շենքերի բնակիչներին խնդրել են տարհանվել՝ որպես նախազգուշական միջոց՝ հնարավոր հետագա փլուզումներից խուսափելու համար։

Ֆեսում՝ 8-րդ դարից ի վեր նախկին մայրաքաղաքում և երկրի բնակչության թվով երրորդ քաղաքում, վերջին ամիսներին տեղի են ունեցել նմանատիպ դեպքեր, այդ թվում՝ դեկտեմբերին, երբ երկու շենքի փլուզման հետևանքով զոհվել էր առնվազն 22 մարդ։

2010 թվականին պատմական հյուսիսային Մեկնես քաղաքում մինարեթի փլուզման հետևանքով զոհվել է 41 մարդ։

Մարոկկոյի բնակարանաշինության հարցերով պետական քարտուղար Ադիբ Բեն Իբրահիմը անցյալ տարի հայտարարել էր, որ ամբողջ երկրում մոտ 38 800 շենք դասակարգվել է որպես փլուզման վտանգի տակ գտնվող։

Source: https://news.am/hy/news/1037265