Նոր Ford Capri-ն այնպիսի ավտոմեքենա է դարձել, որի շուրջ վեճերը չեն դադարում հենց դեբյուտից ի վեր։

Autocar պորտալի լրագրողները, որոնք մեքենայով անցել են գրեթե 20 հազար կիլոմետր, եկել են հետևյալ եզրակացության. ինքնին ավտոմեքենան բավականին հաջող է ստացվել՝ հարմարավետ, գործնական և վարելու համար հաճելի։ Բայց գլխավոր խնդիրն այն է, որ շատերը մինչ օրս պատրաստ չեն այն ընդունել որպես իսկական Capri։

Պատճառը պարզ է. 1970-ականների օրիգինալ Ford Capri-ն թեթև սպորտային կուպե էր, որը համարվում էր հասանելի մեքենա վարելու հաճույքի սիրահարների համար։ Իսկ նոր Capri-ն բարձր ընտանեկան էլեկտրական կրոսովեր է։ Եվ հենց սա է ամենից շատ նյարդայնացնում ավտոսիրողների ու դասական մոդելի երկրպագուների մի մասին։ Շատերը կարծում են, որ Ford-ը լեգենդար անվանումն օգտագործել է պարզապես մարքեթինգի համար։

Միևնույն ժամանակ, լրագրողները հաճախ գովաբանում են հենց ավտոմեքենան։ Չնայած Volkswagen-ի էլեկտրամոբիլների հետ ընդհանուր հարթակին, Ford-ի ինժեներներին հաջողվել է Capri-ն դարձնել ավելի «կենդանի» կառավարման մեջ։

Մեքենան ճանապարհին իրեն վստահ է պահում, մնում է հարմարավետ երկար ուղևորությունների ժամանակ և լավ է համապատասխանում ամենօրյա օգտագործման համար։ Ձմռանը իրական ընթացքի պաշարը կազմել է մոտ 460 կիլոմետր, ինչը խոշոր էլեկտրական կրոսովերի համար լավ արդյունք է համարվում։

Հիմնական դժգոհությունները վերաբերում են գնին և ինտերիերին։ Սրահը շատերին չափազանց պարզ և անարտահայտիչ է թվում, իսկ ավտոմեքենայի արժեքը Բրիտանիայում հասնում է 56 հազար ֆունտի․ այդպիսի գումարի դեպքում գնորդներն արդեն սկսում են նայել ավելի պրեմիում բրենդների կողմը։

Արդյունքում նոր Capri-ն հայտնվել է ոչ հեշտ իրավիճակում։ Եթե այն ընկալել պարզապես որպես Ford-ի ժամանակակից էլեկտրական կրոսովեր, ապա արձագանքներն ընդհանուր առմամբ լավն են։

Բայց լեգենդար Capri անվանումը ինքնաբերաբար բոլորովին այլ սպասումներ է առաջացնում, և հենց այդ պատճառով էլ ավտոմեքենայի շուրջ մինչ օրս այդքան շատ վեճեր կան։

Source: https://news.am/hy/news/1037128