Եվրոպական տիեզերական գործակալությունը (ESA) Չինաստանի գիտությունների ակադեմիայի (CAS) հետ համատեղ արձակել է Vega-C կրող հրթիռը՝ SMILE տիեզերական ապարատով։ Կուրուի (Ֆրանսիական Գվիանա) տիեզերակայանից մեկնարկած առաքելությունը նպատակ ունի ուսումնասիրելու արեգակնային քամու և Երկրի մագնետոսֆերայի փոխազդեցությունը։ Այդ մասին մայիսի 19-ին հայտնել է Popular Science ամսագիրը։

Solar wind Magnetosphere Ionosphere Link Explorer (SMILE) նախագիծը նախատեսված է երեք տարվա համար։ Առաջիկա մեկ ամսվա ընթացքում ապարատը 11 անգամ կմիացնի շարժիչը, որպեսզի դուրս գա բարձր էլիպսաձև ուղեծիր՝ Հյուսիսային և Հարավային բևեռների վերևում։ Տվյալների լիարժեք հավաքագրումը կսկսվի ընթացիկ տարվա հուլիսին։

SMILE-ը կդառնա առաջին առաքելությունը, որը մագնետոսֆերան դիտարկելու համար կօգտագործի ռենտգենյան ճառագայթում։ Բորտում տեղադրված են չորս սարքեր, այդ թվում՝ ռենտգենյան և ուլտրամանուշակագույն տեսախցիկներ։ Վերջինս հնարավորություն կտա 45 ժամ շարունակ անընդհատ գրանցել բևեռափայլերը։ Գիտնականները հույս ունեն համադրել ստացված տվյալները, որպեսզի հասկանան, թե ինչպես է մոլորակը արձագանքում արեգակնային մասնիկների մշտական ռմբակոծությանը և պսակային զանգվածի արտանետումներին։

Աստղագետները շեշտում են, որ հենց մագնետոսֆերան է պաշտպանում մոլորակի վրա կյանքը տիեզերական ճառագայթման և գեոմագնիսական փոթորիկների կործանարար ազդեցությունից, սակայն դրա գործարկման ճշգրիտ մեխանիզմները մինչ օրս մնում են ուսումնասիրության առարկա։ SMILE առաքելությունը կոչված է լրացնելու գիտելիքների այդ բացերը՝ Եվրոպայի և Չինաստանի գիտնականների միջազգային համագործակցության շնորհիվ։

Source: https://news.am/hy/news/1036924