Արաբական Միացյալ Էմիրությունների (ԱՄԷ) նախագահի դիվանագիտական խորհրդական Անվար Գարգաշը կարծում է, որ Իրանի ղեկավարության հարցը պետք է լուծվի բացառապես իսլամական հանրապետության քաղաքացիների կողմից։

«Իրանի քաղաքական կարգի ապագան կախված է երկրի մարդկանցից։ Չեմ կարծում, թե մեզ դուր կգար, եթե որևէ մեկը սկսեր ցույց տալ, թե ով պետք է մեզ ղեկավարի։ Կարծում եմ՝ քաղաքական կարգի հարցը՝ արդյոք այն համապատասխանում է նրանց, թե կարիք ունի որևէ փոփոխության, պետք է թողնել իրանցիներին», - ասել է Գարգաշը GLOBSEC սլովակյան վերլուծական կենտրոնի կազմակերպած ֆորումում ունեցած ելույթի ժամանակ։

Նա ավելացրել է, որ ԱՄԷ-ն «պետք է հարգի» իրանցի ժողովրդի ընտրությունը։

Մայիսի 14-ին Իրանի արտգործնախարար Աբաս Արաղչին մեղադրել էր ԱՄԷ-ին իսլամական հանրապետության դեմ ԱՄՆ և Իսրայելի ագրեսիային անմիջական մասնակցության մեջ՝ կոչ անելով վերանայել քաղաքականությունն իր երկրի նկատմամբ։

Source: https://news.am/hy/news/1037530