Ուկրաինայի և ԱՄՆ-ի միջև հակաօդային պաշտպանության հակահրթիռային համակարգերի արտադրության ընդլայնման շուրջ բանակցությունները գործնականում առաջ չեն շարժվում, ինչի կապակցությամբ Կիևն իր ջանքերը վերաուղղորդում է եվրոպացի գործընկերների հետ համագործակցությանը։ Դրա մասին երկուշաբթի հայտարարել է Ուկրաինայի նախագահ Վլադիմիր Զելենսկին։

«Ցավոք, հակահրթիռային համալիրների արտադրության ընդլայնման վերաբերյալ Ամերիկայի հետ երկխոսության մեջ արդեն երկար ժամանակ որևէ առաջընթաց չկա»,- հայտնել է Զելենսկին իր երեկոյան տեսաուղերձում։

Դրա հետնապատկերում, ըստ նախագահի, ուկրաինական իշխանությունները փորձում են ակտիվացնել աշխատանքը Եվրոպայում, որպեսզի մայրցամաքում բավարար ծավալներով կազմակերպեն սեփական հակահրթիռային պաշտպանության համակարգերի թողարկումը։

Վլադիմիր Զելենսկին նշել է, որ Կիևը նախկինի պես շարունակում է Վաշինգտոնի հետ քննարկել աջակցության հնարավոր մեխանիզմները՝ ընդգծելով, որ ամերիկյան առաջնորդությունն այս հարցում մնում է կենսականորեն կարևոր։

Միևնույն ժամանակ, պետության ղեկավարն առանձնահատուկ երախտագիտություն է հայտնել Ֆրանսիայի նախագահ Էմանուել Մակրոնին՝ պաշտպանական համակարգերի մշակման գործում նրա ակտիվ մասնակցության համար, ինչպես նաև շնորհակալություն է հայտնել եվրոպական երկրներին՝ ընդհանուր առմամբ ֆինանսական օգնություն ցուցաբերելու համար, որը Ուկրաինային հնարավորություն է տալիս անհրաժեշտ սպառազինություն ձեռք բերել։

«Եվրոպան մեզ օգնում է ֆինանսապես։ Սակայն Միացյալ Նահանգների առաջնորդությունը ևս խիստ անհրաժեշտ է։ Այսօր շատ ու շատ կարևոր է դրա մասին ուղիղ ասել»,- հավելել է Զելենսկին։

Ըստ նրա ՝ Ուկրաինան բարձր է գնահատում ԱՄՆ-ի փորձագիտական փորձը, սակայն հիմա կրիտիկական կարևորություն ունի իրական արդյունքներ տեսնելը։ Այդ կապակցությամբ Կիևն առաջիկայում ակնկալում է «նոր դիվանագիտական քայլեր»՝ ամերիկյան վարչակազմի պաշտոնական ներկայացուցիչների հետ փոխգործակցության գծով։

Source: https://news.am/hy/news/1038294