Սերբիայի նախկին փոխվարչապետ և «Սոցիալիստների շարժում» կուսակցության նախագահ Ալեքսանդր Վուլինը ՏԱՍՍ գործակալությանը տված հարցազրույցում հայտարարել է, որ հանրապետության գործող ղեկավար Ալեքսանդր Վուչիչն այլևս չի առաջադրվելու նախագահի պաշտոնում։

«Ո՛չ»,- պատասխանել է Վուլինը՝ անդրադառնալով այն հարցին, թե արդյոք հրաժարականի մասին Վուչիչի խոսքերը կարող են նշանակել նորից թեկնածությունն առաջադրելու մտադրություն։

Նախկին փոխվարչապետը նշել է, որ Վուչիչը հարգում է Սահմանադրությունը, իսկ Սերբիայի մայր օրենքով՝ նախագահի պաշտոնը կարելի է զբաղեցնել միայն երկու ժամկետ: Միևնույն ժամանակ, Վուլինը վստահություն է հայտնել, որ գործող նախագահը պաշտոնից հեռանալուց հետո էլ կշարունակի իր դերակատարումն ունենալ Սերբիայի քաղաքական կյանքում:

«Նա շարունակում է մնալ առանցքային դերակատար, և նրա առաքելությունը դեռ հեռու է ավարտված լինելուց։ Սակայն Սերբիայի նախագահի պաշտոնում նրան այլևս չենք տեսնի», — նշել է Վուլինը։

Մայիսի 25-ին՝ Չինաստան կատարած այցի ընթացքում, Վուչիչը հայտարարել էր, որ հնարավոր է շուտով հրաժարականի դիմում ներկայացնի։ Միևնույն ժամանակ, քաղաքական գործիչն ընդգծել էր, որ չի պատրաստվում երկարաձգել կամ փոփոխել իր լիազորությունների ժամկետը՝ ինչպես ժամանակին արել էր նախկին նախագահ Բորիս Տադիչը։

Վուչիչի նախագահական երկրորդ ժամկետն ավարտվում է 2027 թվականի գարնանը։

Source: https://news.am/hy/news/1039964