ԱՄՆ նախագահ Դոնալդ Թրամփը Fox News հեռուստաալիքին տված հարցազրույցում հայտարարել է, որ Վաշինգտոնը շարունակում է հույս ունենալ Իրանի հետ համաձայնության հասնելու վրա, սակայն բանակցությունների ձախողման դեպքում պատրաստ է դիտարկել ռազմական սցենարը։

Ըստ Թրամփի, Միացյալ Նահանգները մտադիր է Թեհրանի հետ կնքել «հիանալի գործարք»։

«Մենք հիանալի գործարք կկնքենք, իսկ եթե ոչ՝ պարզապես կվերադառնանք և կավարտենք դա ռազմական ճանապարհով», - պարզաբանել է նա։

Ամերիկացի առաջնորդն ընդգծել է, որ կնախընտրեր դիվանագիտական կարգավորումը, քանի որ դա թույլ կտա խուսափել մարդկային զոհերից։

«Ես կնախընտրեի գործարք կնքել, որովհետև դա շատ կյանքեր կփրկի, և մենք կկարողանանք անմիջապես բացել նեղուցը համաձայնագրի ստորագրումից հետո», - ընդգծել է ԱՄՆ նախագահը։

Խոսելով Իրանի ղեկավարության մասին՝ Թրամփը այն բնութագրել է որպես շատ կոշտ բանակցողներ, սակայն վստահություն է հայտնել, որ ԱՄՆ-ն աստիճանաբար հասնում է ցանկալի արդյունքների։

«Նրանք շատ կոշտ բանակցողներ են», - ասել է նա։

Միաժամանակ ԱՄՆ նախագահը նշել է, որ չի պատրաստվում արագացնել բանակցային գործընթացը։

«Սա շատ ժամանակ է պահանջում։ Ես ոչ մի տեղ չեմ շտապում։ Եթե շտապեք, լավ գործարք չեք կնքի», - նշել է Թրամփը։

Թրամփի համոզմամբ, Վաշինգտոնը աստիճանաբար շարժվում է դեպի իր նպատակները, սակայն պահպանում է նաև գործողությունների այլ տարբերակներ։

«Դանդաղ, բայց հաստատուն կերպով մենք ստանում ենք, ինչպես ինձ թվում է, այն, ինչ ուզում ենք։ Իսկ եթե չստանանք այն, ինչ ուզում ենք, ապա դա կավարտենք այլ ձևով», - ասել է նա։

Source: https://news.am/hy/news/1039706