Սպիտակ տան մոտ գնդակահարել են զինված տղամարդու, որը կրակ է բացել Գաղտնի ծառայության անցակետի ուղղությամբ

Զինված տղամարդը սպանվել է այն բանից հետո, երբ շաբաթ երեկոյան Սպիտակ տան մոտ կրակ է բացել ԱՄՆ Գաղտնի ծառայության հսկիչ-անցագրային կետի ուղղությամբ, CBS News-ին է հայտնել գործակալության ներկայացուցիչը։

Գաղտնի ծառայության աշխատակիցները պատասխան կրակ են բացել՝ վիրավորելով կասկածյալին, որը հետագայում մահացել է հիվանդանոցում։ Վիրավորվել է նաև պատահական մի անցորդ, սակայն Գաղտնի ծառայության գործակալներից ոչ ոք չի տուժել։

Միջադեպի պահին ԱՄՆ նախագահ Դոնալդ Թրամփը գտնվել է Սպիտակ տանը, սակայն չի տուժել, ասել է Գաղտնի ծառայության ներկայացուցիչը։

Կասկածյալը 21-ամյա Նասիր Բեստն է եղել։ Աղբյուրի համաձայն, Բեստը արդեն բախում էր ունեցել Գաղտնի ծառայության հետ 2025 թվականի հուլիսին, երբ փորձել էր ներթափանցել Սպիտակ տուն, ձերբակալվել էր և հոգեկան առողջության հետ կապված խնդիրների պատճառով տեղափոխվել հոգեբուժական բաժանմունք։

Կրակոցները հնչել են Սպիտակ տան մոտ՝ 17-րդ փողոցի և Փենսիլվանիա պողոտայի խաչմերուկում՝ հյուսիս-արևմուտքում, Էյզենհաուերի վարչական շենքից ոչ հեռու։

Ինչպես CBS News-ին հայտնել են իրավապահ մարմինների աղբյուրները, արձակվել է 15-ից 30 կրակոց։ CBS News-ի մի քանի լրագրողներ, որոնք գտնվել են Սպիտակ տան Հյուսիսային մարգագետնում, պատմել են, որ արևելյան ժամանակով մոտ 18:00-ին լսել են կրակոցների նմանվող ձայներ, նախքան ԱՄՆ Գաղտնի ծառայությունը նրանց ներս է թողել։ Սպիտակ տանը սահմանված արգելափակումը հանվել է տեղական ժամանակով մոտավորապես 19:00-ին։

Source: https://news.am/hy/news/1037842