Ուրբաթ երեկոյան Երուսաղեմում և Բեյթ-Շեմեշ քաղաքում տեղի են ունեցել զանգվածային անկարգություններ՝ հարյուրավոր ուլտրաօրթոդոքս հրեաների (հարեդիմներ) մասնակցությամբ, որոնք բողոքում էին զինվորական ծառայությունից խուսափելու համար իրականացված ձերբակալությունների դեմ, հաղորդել է Times of Israel-ը։
Իրավապահ մարմինների տվյալներով՝ Երուսաղեմում ցուցարարները բազմիցս փորձել են ներխուժել Ռուսական համալիրի շրջանում գտնվող ոստիկանության բաժանմունք, սակայն ոստիկանական ուժերի կողմից հետ են մղվել։ Բեյթ-Շեմեշում անկարգությունների մասնակիցները քարեր և տարբեր առարկաներ են նետել ոստիկանների ուղղությամբ, որոնք ուժ են կիրառել ամբոխը ցրելու համար։
Տեղի լրատվամիջոցների հաղորդմամբ՝ ուշ երեկոյան դեպքի վայր են ուղարկվել սահմանապահ ոստիկանության լրացուցիչ ստորաբաժանումներ, որոնք շարունակել են ցրել ցուցարարներին։
Նշվել է, որ անկարգությունները բռնկվել են ուլտրաօրթոդոքս տղամարդկանց բանակ զորակոչելու շուրջ շարունակվող հակամարտության ֆոնին։
Իսրայելում այս հարցը մնում է չափազանց զգայուն. հարեդիմներն ավանդաբար ձգտում են չծառայել, մինչդեռ զինվորականներն ու քաղաքական գործիչների մի մասը պնդում են զորակոչի ընդլայնման անհրաժեշտությունը՝ անձնակազմի պակասի ֆոնին։
Ynet-ի տվյալներով՝ բողոքի ցույցերի ընթացքում ցուցարարների մի մասը փորձել է կոտրել ոստիկանության բաժանմունքի դարպասները՝ պահանջելով ազատ արձակել ձերբակալվածներին, որոնք կալանավորվել էին նախորդ միջադեպերից հետո։ Հաղորդվել է նաև տուժած քաղաքացիական անձի մասին, որին ծեծել են անկարգությունների ժամանակ։
Զորակոչի շուրջ հակամարտությունն ուժեղացել է վերջին մի շարք միջադեպերից հետո, ներառյալ Գերագույն դատարանի դատավոր Նոամ Սոլբերգի տան վրա հարձակումը և բողոքի այլ ակցիաները, որոնք ուղեկցվել են վանդալիզմով և ոստիկանության հետ բախումներով։ Վերջին իրադարձությունները կտրուկ քաղաքական արձագանք են առաջացրել և ուժեղացրել Իսրայելում պարտադիր զինվորական ծառայության համակարգի ապագայի շուրջ հանրային քննարկումները։
Source: https://news.am/hy/news/1041450