Տասնյակ գրոհայիններ երեքշաբթիի վաղ առավոտյան հարձակվել են Պակիստանի հարավ-արևմուտքում գտնվող ոստիկանական հենակետի վրա, ինչը հանգեցրել է կատաղի մարտի։ Հարձակման հետևանքով զոհվել է ինը ոստիկան, մի քանիսն էլ վնասվածքներ են ստացել, հաղորդում է Associated Press-ը։
Հարձակումը տեղի է ունեցել երկուշաբթի ուշ երեկոյան անհանգիստ Բելուջիստան նահանգի Զիարատ շրջանի հեռավոր շրջանում, որտեղ վերջին ամիսներին հաճախակիացել են ուժայինների վրա զինված խմբավորումների հարձակումները։
Ոստիկանության տվյալներով՝ հարձակվողները առևանգել են նաև իրավապահ մարմինների ութ աշխատակիցների, սակայն անվտանգության ուժերի գործողության արդյունքում նրանք բոլորն ավելի ուշ ազատ են արձակվել։
Բելուջիստանի կառավարության ներկայացուցիչ Շահիդ Ռինդը հայտարարել է, որ հետագա գործողությունն ավարտվել է 15 գրոհայինների ոչնչացմամբ։ Նա ընդգծել է, որ զինված խմբերի դեմ հետախուզական գործողությունները կշարունակվեն, իսկ իշխանությունները մտադիր են վճռական պատասխան տալ անվտանգության ուժերի դեմ ցանկացած հարձակման։
Առայժմ որևէ խմբավորում հարձակման պատասխանատվությունը չի ստանձնել։ Այնուամենայնիվ, սպասվում է, որ կասկածները կարող են ընկնել Պակիստանում արգելված «Բելուջիստանի ազատագրական բանակ» (BLA) կազմակերպության վրա։ Այդ կազմակերպությունը նախկինում հայտարարել էր Ջիվանի ծովափնյա քաղաքում անվտանգության ուժերի հենակետի վրա մահապարտ-ահաբեկչի հարձակմանն իր առնչության մասին։ Տեղական լրատվամիջոցների տվյալներով՝ այն ժամանակ զոհվել էր երեք ուժային, սակայն կառավարությունը չէր հաստատել և չէր հերքել այդ տեղեկությունը։
Իշխանությունները հաստատել են նաև, որ հանգստյան օրերին զինված անձինք հարձակվել են խաղաղ բնակիչների վրա նահանգի վարչական կենտրոն Քվետայի արվարձանում։ Դրանից հետո մի քանի բնակավայրերի բնակիչներ քաղաքի մոտ նստացույց են սկսել՝ պահանջելով ուժեղացնել անվտանգությունը և պաշտպանել բնակչությանը նոր հարձակումներից։
Պակիստանի ներքին գործերի նախարար Մոհսին Նակվին վերջին հարձակման մեջ մեղադրել է Հնդկաստանի հետ կապեր ունեցող գրոհայիններին, սակայն իր հայտարարությունները հիմնավորող ապացույցներ չի ներկայացրել։
Հնդկաստանը բազմիցս հերքել է Բելուջիստանում անջատողականներին կամ պակիստանյան թալիբների խմբավորմանը աջակցելու վերաբերյալ Իսլամաբադի մեղադրանքները։
Բացի ոստիկանական հենակետի վրա հարձակումից, երեքշաբթի Քվետայի արվարձանում մեկ այլ միջադեպ է տեղի ունեցել. երկու երեխա զոհվել է, ևս մեկը վիրավորվել ճամփեզրին տեղադրված չպայթած սարքի պայթյունից։ Ըստ տեղի ոստիկան Մոհամմադ Հասանի՝ երեխաները պայթուցիկ սարքը խաղալիքի տեղ են դրել, գտել են այն և տուն բերել, ինչից հետո այն պայթել է։ Թե ով է տեղադրել ռումբը, դեռևս պարզված չէ, քննությունը շարունակվում է։
Բելուջիստանը տարածքով ամենախոշոր, բայց Պակիստանի ամենաքիչ բնակեցված նահանգն է. այն արդեն երկար տարիներ մնում է զինված դիմակայության կենտրոն, որին մասնակցում են անջատողական խմբավորումները և պակիստանյան «Թեհրիկ-ե-Թալիբան Պակիստան» շարժումը։
«Բելուջիստանի ազատագրական բանակը», որին ԱՄՆ-ը 2019 թվականին ներառել է օտարերկրյա ահաբեկչական կազմակերպությունների ցանկում, վերջին տարիներին պատասխանատվություն է ստանձնում ամբողջ նահանգում ուժայինների և քաղաքացիական անձանց դեմ իրականացված բազմաթիվ հարձակումների համար։
Source: https://news.am/hy/news/1048467