Առնվազն 16 մարդ է զոհվել, ևս մի քանիսը վիրավորվել են կիրակի օրը Պակիստանի Քվետտա քաղաքում Չաման-Պատակ շրջանի մոտ գտնվող երկաթուղային գծերի վրա տեղի ունեցած պայթյունի հետևանքով, հաղորդում է ԱՌՌ-ն։

Պակիստանական գործակալության աղբյուրների հաղորդմամբ, ոստիկանությունում հայտնել են, որ պայթյունը տեղի է ունեցել Չաման-Պատակի մոտ, երբ ուղևորներով գնացքն անցնում էր այդ տարածքով։

Աղբյուրների վկայությամբ, գնացքում գտնվող մարդիկ ուղևորվում էին իրենց շրջաններ՝ Իդ ալ-Ֆիտրը տոնելու համար։

Զոհվածների մարմիններն ու վիրավորները տեղափոխվել են քաղաքացիական հիվանդանոց։

Պայթյունի հետևանքով վնասվել են ճանապարհի երկայնքով կայանված տրանսպորտային միջոցները։ Իրավապահ մարմինները ժամանել են դեպքի վայր, շրջափակել ամբողջ տարածքը և հետաքննություն սկսել։

Source: https://news.am/hy/news/1037863