Մեծ Բրիտանիայի ոստիկանությունը ձերբակալել է 28-ամյա մի տղամարդու՝ նախկին նախարար և պատգամավոր Էնն Ուիդեկոմբի սպանության կասկածանքով, հայտնում է The Guardian-ը։
Կասկածյալը, որը Մեծ Բրիտանիայի սպիտակամորթ քաղաքացի է, ձերբակալվել է շաբաթ երեկոյան Հարավային Յորքշիրի շրջանում և շարունակում է մնալ կալանքի տակ։
Դևոնի և Քորնուոլի ոստիկանությունից հայտնել են, որ գործողությունն իրականացվել է Հյուսիսարևելյան Անգլիայի ահաբեկչության դեմ պայքարի ստորաբաժանման և Հարավային Յորքշիրի ոստիկանության մասնակցությամբ։ Միաժամանակ իրավապահները ընդգծել են, որ այս պահին որևէ նշան չկա, թե հանցագործությունը կապված է ահաբեկչության հետ։
Ոստիկանությունը հայտնել է, որ 78-ամյա Ուիդեկոմբը կարող էր իր տանը մահացած մնացած լինել գրեթե մեկ օր՝ մինչև մարմնի հայտնաբերումը։ Քննության վարկածով, հարձակումը կարող էր տեղի ունեցած լինել չորեքշաբթի օրը՝ մոտ 12:30-ին։ Նրա մարմինը հայտնաբերել են շտապօգնության աշխատակիցները Դևոն կոմսության Հեյտորում գտնվող բունգալոյում՝ հինգշաբթի տեղական ժամանակով մոտ 11:40-ին։
Մեկ այլ տղամարդ, 26 տարեկան, որը նախկինում ձերբակալվել էր Նյուտոն-Էբոտ քաղաքում՝ հետաքննության շրջանակում, ազատ է արձակվել առանց մեղադրանք առաջադրելու և այլևս գործով չի անցնում։
Դևոնի և Քորնուոլի ոստիկանության պետի տեղակալ Մեթ Լոնգմանը հայտարարել է, որ Ուիդեկոմբի մահը դիտարկվում է որպես կասկածելի, սակայն ոստիկանությունը տվյալներ չունի բնակչության համար ավելի լայն սպառնալիքի վերաբերյալ։ Նա կոչ է արել վկաներին տրամադրել ցանկացած տեղեկություն և խնդրել է սոցիալական ցանցերում ենթադրություններ չտարածել։
Քննիչները շարունակում են պարզել հանցագործության հանգամանքները և վերլուծում են առկա ապացույցները։ Ոստիկանությունը նաև հայտնել է, որ առայժմ չի հրապարակելու հնարավոր կասկածյալի նկարագրությունը կամ տեսահսկման տեսախցիկների գրառումները, որպեսզի չվնասի հետաքննությանը։
Էնն Ուիդեկոմբը եղել է Պահպանողական կուսակցության նախկին նախարար և 23 տարի Մեյդսթոուն ընտրատարածքից ընտրված պատգամավոր։ 2010 թվականին Համայնքների պալատից հեռանալուց հետո նա լայն ճանաչում ստացավ Strictly Come Dancing շոուին մասնակցելու շնորհիվ, որտեղ հասավ մինչև կիսաեզրափակիչ։
2019 թվականին Ուիդեկոմբը միացավ Նայջել Ֆարաջի «Բրեքսիթ» կուսակցությանը, իսկ ավելի ուշ դարձավ Reform UK կուսակցության ներգաղթի և արդարադատության հարցերով ներկայացուցիչը։ Նա հայտնի էր նաև աբորտների և միասեռ ամուսնությունների հարցում իր պահպանողական հայացքներով։
Source: https://news.am/hy/news/1049347