Ուրալում ադրբեջանական համայնքի նախկին ղեկավար Շահին Շըխլինսկիին, ով Եկատերինբուրգում գործարարների սպանությունների գործով դատապարտվել է 24 տարվա ազատազրկման, կարող են ներառել հնարավոր փոխանակման մեջ՝ Բաքվում կալանքի տակ գտնվող Ռուսաստանի քաղաքացիների մասնակցությամբ։ Դրա մասին հայտնում է E1-ը՝ հղում անելով աղբյուրներին, հաղորդում է The Moscow Times-ը։
Պարբերականի տվյալներով՝ փոխանակումը կարող է տեղի ունենալ արդեն օգոստոսին։ Զրուցակիցների տեղեկություններով՝ գործընթացում կարող է ներառվել նաև Շըխլինսկու որդին։
E1-ի աղբյուրներից մեկը հայտարարել է, որ համայնքի նախկին ղեկավարը «100%-ով վստահ է» փոխանակմանը իր մասնակցության հարցում և լավատեսորեն է տրամադրված։
Ավելի վաղ Ռուսաստանի փոխարտգործնախարար Միխայիլ Գալուզինը հայտնել էր, որ Մոսկվան ծրագրում է այս հարցը քննարկել Ադրբեջանի արտգործնախարար Ջեյհուն Բայրամովի հետ։
Ռուսաստանի և Ադրբեջանի միջև հարաբերությունները սրվել էին 2025 թվականի ամռանը՝ Եկատերինբուրգում իրականացված զանգվածային ձերբակալությունների և քննչական գործողությունների ժամանակ Ադրբեջանի երկու քաղաքացիների մահվան ֆոնին։ Դրանից հետո Բաքվում ձերբակալվել էին Ռուսաստանի քաղաքացիներ, որոնց մեղադրանքներ էին առաջադրվել, իսկ նրանցից մի մասը հետագայում դատապարտվել էր։
Source: https://news.am/hy/news/1047722