Լեհաստանը մտադիր է առաջիկա տարիներին շուրջ 150 միլիարդ դոլար ներդնել պաշտպանունակության ոլորտում։ Այս մասին «RMF FM» ռադիոկայանի եթերում հայտնել է երկրի ազգային պաշտպանության փոխնախարար Ցեզարի Տոմչիկը։
Նրա խոսքով՝ այս միջոցները կհատկացվեն արդեն իսկ ծախսված 65 միլիարդ դոլարից զատ, որ Վարշավան ներդրել է ամերիկյան սպառազինության գնման և ռազմական ենթակառուցվածքների զարգացման համար։ Տոմչիկը նշել է, որ Լեհաստանը մտադիր է դառնալ Եվրոպայում ՆԱՏՕ-ի խոշորագույն սպասարկման կենտրոնը և բանակցություններ է վարում ԱՄՆ-ի հետ «Patriot» համալիրների հրթիռների համատեղ արտադրության շուրջ։
Փոխնախարարը նաև հայտնել է, որ լեհական իշխանությունները Վաշինգտոնին պաշտոնական առաջարկ են ուղարկել երկրի տարածքում ամերիկյան մշտական ռազմաբազա ստեղծելու վերաբերյալ։ Նրա փոխանցմամբ՝ քաղաքական համաձայնությունն արդեն ստացվել է, իսկ որպես հնարավոր տեղանքներ դիտարկվում են Վելիկոպոլսկի և Նժնեսիլեզյան (Ստորին Սիլեզիայի) վոյեվոդությունները, որտեղ առկա է ՆԱՏՕ-ի ուժերի տեղակայման համար անհրաժեշտ ենթակառուցվածքը։ Ակնկալվում է, որ վերջնական որոշումը կկայացվի առաջիկա շաբաթներին։
Անդրադառնալով Ուկրաինային լեհական «ՄիԳ-29» կործանիչների հնարավոր փոխանցմանը՝ փոխնախարարը հայտարարել է, որ Լեհաստանը պատրաստ է ինքնաթիռները հանձնել «թեկուզ վաղը»՝ ուկրաինական անօդաչու թռչող սարքերի տեխնոլոգիաների դիմաց։ Միևնույն ժամանակ նա նշել է, որ կողմերը դեռևս չեն համաձայնեցրել փոխանցվող տեխնիկայի արդիականացման պայմանները։
Տոմչիկի խոսքով՝ ապագայում Լեհաստանն ակնկալում է ընդլայնել ԱՄՆ-ի հետ համագործակցությունը՝ հիմնելով «Patriot», «Hellfire» և «HIMARS» համալիրների հրթիռների համատեղ արտադրություն։
Source: https://news.am/hy/news/1049532