Բրիտանական Talos ընկերությունը ներկայացրել է Talos 911 RT նախագիծը՝ Porsche 911 GT3 RS-ի 992.2 սերնդի խորապես ձևափոխված տարբերակը, որն իրականացվել է ռեստոմոդի ձևաչափով՝ շեշտադրելով կառուցվածքի թեթևացումը, հզորության ավելացումը և թրեքային արտադրողականությունը, հաղորդում է Motorious-ը։

Հիմնական Porsche 911 GT3 RS-ն արդեն համարվում է սերիական ամենաթրեքային սպորտքարերից մեկը, սակայն Talos-ը ուժեղացրել է դրա բնութագրերը՝ վերամշակելով թափքի և շասսիի հիմնական տարրերը։

Գլխավոր փոփոխություններից մեկը դարձել է ամբողջությամբ ածխապլաստիկե թափքը՝ բաց տեսանելի կարբոնային կառուցվածքով՝ առանց ներկման և դեկորատիվ տարրերի։ Ընկերության տվյալներով, դա թույլ է տվել մեքենայի զանգվածը նվազեցնել մոտ 80 կգ-ով (176 ֆունտ)։ Դիզայնում օգտագործվել են Porsche 911 R-ից ներշնչված տարրեր, ներառյալ մինիմալիստական հարդարումը և շեշտադրումը «մերկ» կարբոնի վրա։

Մեքենան ստացել է նաև կատարելագործված Ohlins TTX կախոց՝ տարբեր պայմաններին համապատասխան կարգավորման հնարավորությամբ, ներառյալ կառավարումը բջջային հավելվածի միջոցով։

Շարժիչի հզորությունը բարձրացվել է 500-ից մինչև 540 ձիաուժ, ընդ որում ընկերությունը չի բացահայտում տեխնիկական փոփոխությունների մանրամասները՝ նշելով հզորության ավելի սահուն և վերահսկելի փոխանցումը։

Նախագիծը կթողարկվի սահմանափակ շարքով՝ ընդամենը 20 ավտոմեքենա։ Յուրաքանչյուր օրինակ նախատեսում է անհատական կազմաձևում։

Վերամշակման արժեքը սկսվում է մոտ 1,15 մլն դոլարից՝ առանց բազային ավտոմեքենայի հաշվառման, ինչը ընդհանուր առմամբ կարող է գինը հասցնել մոտ 1,5 մլն դոլարի։

Source: https://news.am/hy/news/1039629