Ռազմավարական կարևորություն ունեցող Բոֆոր ամրոցը, որը կառուցվել է խաչակրաց արշավանքների ժամանակաշրջանում և վերահսկում է Հարավային Լիբանանի բարձունքների զգալի մասը, հայտնվել է ռազմական գործողությունների կենտրոնում․ լիբանանյան պետական Ազգային լրատվական ծառայության (NNA) տվյալներով՝ նրա շրջակայքում գրանցվել են իսրայելական ավիահարվածներ և հրետանային գնդակոծություններ՝ սահմանամերձ շրջաններում շարունակվող բախումների ֆոնին։

Բոֆոր ամրոցը գտնվում է Իսրայելի հետ սահմանից մոտ 15 կիլոմետր հեռավորության վրա և զբաղեցնում է գերիշխող դիրք Հարավային Լիբանանի զգալի մասի նկատմամբ, ինչն այն դարձնում է տեղանքի վերահսկման կարևոր մարտավարական կետ։ Պատմականորեն այս օբյեկտն ունի նաև լրացուցիչ նշանակություն․ 1980–1990-ականներին այն 18 տարի գտնվել է իսրայելական զորքերի վերահսկողության տակ և լքվել է 2000 թվականին Իսրայելի՝ Լիբանանից դուրս բերվելուց հետո։

Միաժամանակ հաղորդվել է Լիբանանի հարավային շրջանների, այդ թվում՝ Նաբաթիայի շրջանի բնակավայրերի շարունակվող հարվածների մասին։ Լիբանանյան աղբյուրների տվյալներով՝ գնդակոծություններն ու ավիահարվածներն ազդել են մի քանի գյուղերի վրա, այդ թվում՝ Անսարի, որտեղ զոհվել է երեք մարդ, ինչպես նաև Էբբայի և Նաբաթիայի միջև ընկած ճանապարհահատվածի վրա, որտեղ անօդաչու թռչող սարքի հարվածի հետևանքով վիրավորվել է երկու լիբանանցի զինծառայող։

Լիբանանյան կողմի հաղորդմամբ՝ իսրայելական ուժերը շարունակում են առաջխաղացումը սահմանամերձ շրջաններում, ներառյալ Յոհմոր և Զաութա-էշ-Շարքիա բնակավայրերը, Լիտանի գետն անցնելուց հետո։ Բեյրութում հայտարարում են, որ սա իսրայելական ստորաբաժանումների ամենախոր առաջխաղացումն է 2000 թվականին զորքերի դուրսբերումից ի վեր, և որ երկրի հարավի զգալի մասը շարունակում է մնալ նրանց վերահսկողության տակ՝ չնայած ԱՄՆ միջնորդությամբ գործող հրադադարի համաձայնագրին։

Լիբանանի վարչապետ Նավաֆ Սալամը դատապարտել է հարվածները՝ հայտարարելով, որ դրանք նշանակում են ավերման և բնակչության զանգվածային տեղահանության քաղաքականություն, և հաստատել է դիվանագիտական շփումները շարունակելու մտադրությունը, ներառյալ Իսրայելի հետ ուղիղ բանակցությունները, որոնք նա անվանել է «ամենաքիչ ծախսատար տարբերակը», սակայն ո՛չ արդյունքի երաշխիք։

Միևնույն ժամանակ շարունակվում են փոխադարձ գնդակոծությունները Իսրայելի և «Հեզբոլլահի» միջև։ Խմբավորումը հայտարարել է Իսրայելի հյուսիսի, այդ թվում՝ Կիրյաթ-Շմոնայի և Սաֆեդի ուղղությամբ հրթիռային հարվածների մասին՝ ի պատասխան Լիբանանին ուղղված իսրայելական ավիահարվածների։

Առանձին՝ Գազայի հատվածում արձանագրվել է բուժաշխատողի մահ՝ Դեյր էլ-Բալահում գտնվող օբյեկտին հասցված իսրայելական հարվածի հետևանքով։ Տեղի հիվանդանոցների տվյալներով՝ տուժել է ևս մի քանի մարդ։ Իսրայելի բանակը միջադեպը չի մեկնաբանել։

Պաղեստինյան աղբյուրների տվյալներով՝ Գազայում հրադադարի վերջին համաձայնագրից ի վեր զոհվել է ավելի քան 900 մարդ, մինչդեռ ռազմական գործողությունները շարունակվում են կանոնավոր փոխադարձ հարվածների և ռազմական դիրքերի վրա հարձակումների ֆոնին, գրել է Associated Press-ը։

Source: https://news.am/hy/news/1039688