Այն հաղորդագրությունների ֆոնին, որ Միացյալ Նահանգները ծախսել է THAAD (Terminal High Altitude Area Defense) հակահրթիռների իր ընդհանուր պաշարի կեսից ավելին Իրանի դեմ իրականացված «Էպիկական ցասում» («Մռնչացող առյուծ») գործողության ընթացքում, Lockheed Martin կորպորացիան դրել է զինամթերքի արտադրության նոր կենտրոնի հիմնաքարը Ալաբամա նահանգի Տրոյ քաղաքում։

THAAD համալիրը նախատեսված է ինչպես մթնոլորտային շերտերում, այնպես էլ դրանցից դուրս սպառնալիքների որսման համար՝ զբաղեցնելով չափազանց կարևոր միջին էշելոնն ԱՄՆ հակաօդային և հակահրթիռային պաշտպանության բազմամակարդակ համակարգում։ Համակարգում իրագործված է «կինետիկ որսման» (hit-to-kill) սկզբունքը, որի դեպքում հակառակորդի գրոհող հրթիռի ոչնչացումը թռիչքի վերջնական (տերմինալ) փուլում տեղի է ունենում ուղիղ բախման զուտ կինետիկ էներգիայի հաշվին։ Համալիրն ի վիճակի է հայտնաբերել և ուղեկցել թիրախներն ավելի քան 2000 կիլոմետր հեռավորության վրա, իսկ որսումն իրականացնել մինչև 150 կիլոմետր բարձրության վրա։

Ըստ Lockheed Martin-ի մամուլի հաղորդագրության՝ նոր ձեռնարկությունը կավելացնի ավելի քան 8000 քառակուսի մետր (87 հազար քառակուսի ֆուտ) արտադրական տարածք՝ THAAD հակահրթիռների թողարկման, ինչպես նաև «NGI (Next Generation Interceptor) նոր սերնդի որսիչների ծրագրի ապագա աշխատանքների» համար։ Lockheed-ում նշել են, որ այս ենթակառուցվածքի ստեղծումն առաջիկա տասնամյակի համար նախատեսված՝ 9 միլիարդ դոլար ծավալով ավելի լայնամասշտաբ ներդրումային ծրագրի մի մասն է։ Ծրագրի նպատակն է զինամթերքի արտադրության ընդհանուր հզորությունների ավելացումը և ամբողջ ԱՄՆ տարածքում կորպորացիայի ավելի քան 20 օբյեկտների արդիականացումը։

«Այս գործընկերությունը վճռորոշ նշանակություն ունի զինամթերքի արտադրության ծավալների կտրուկ մեծացման համար, և Lockheed Martin ընկերությունն այստեղ առավելագույնս նախաձեռնողական մոտեցում է ցուցաբերել։ Այսօրվա իրադարձությունը մեր փոխգործակցության ամրության և գրանցված առաջընթացի վկայությունն է»,- հիմնարկեքի արարողության ժամանակ հայտարարել է ԱՄՆ պաշտպանության նախարարի գնումների և նյութատեխնիկական ապահովման հարցերով տեղակալ Մայքլ Դաֆֆին։

ԱՄՆ-ից բացի, THAAD համալիրները Արաբական Միացյալ Էմիրությունների, ինչպես նաև Սաուդյան Արաբիայի Թագավորության սպառազինության մեջ են, սաուդցիներն իրենց առաջին մարտկոցները տեղակայել էին անցյալ տարվա հուլիսին։

Իրանի հետ մեկամսյա պատերազմի ընթացքում The Washington Post պարբերականը, հղում անելով մի քանի ամերիկացի պաշտոնյաների, հայտնել էր, որ Իսրայելի պաշտպանության համար արձակվել է ավելի քան 200 THAAD հակահրթիռ, այսինքն՝ Պենտագոնի ամբողջ զինանոցի մոտավորապես կեսը։

ԱՄՆ շատ դաշնակիցներ խոր մտահոգություն են հայտնել հակահրթիռների պաշարների հնարավոր սպառման կապակցությամբ, քանի որ արտադրության ներկայիս տեմպերի պայմաններում ԱՄՆ-ն ի վիճակի չէ կարճաժամկետ հեռանկարում լրացնել Իրանի հետ պատերազմի ժամանակ ծախսված ծավալները։

ԱՄՆ Կոնգրեսի ուսումնասիրության մեջ, որը հրապարակվել էր ռազմական գործողությունների ամենաթեժ պահին, լույս է սփռվում ամերիկյան հասանելի զինանոցի հետ կապված տագնապալի իրավիճակի վրա. «Լուրջ մտահոգություն կա առ այն, որ «Էպիկական ցասում» գործողության ընթացքում THAAD հակահրթիռների սպառման ինտենսիվությունը հանգեցրել է որսիչների առանց այդ էլ սահմանափակ պաշարների էլ ավելի կրճատմանը»։

«THAAD հրթիռների պաշարի համալրումը, որոնցից յուրաքանչյուրն արժե մոտավորապես 12,7 միլիոն դոլար, կարող է պահանջել երեքից ութ տարի»։

Արտաքին քաղաքականության հետազոտությունների ինստիտուտը (FPRI), որը վերլուծական նյութեր է տրամադրել Կոնգրեսի Հետազոտական ծառայությանը (CRS), հանգել է այն եզրակացության, որ ամերիկյան ընթացիկ «Էպիկական ցասում» գործողության առաջին օրերն ավելի ինտենսիվ են եղել, քան ԱՄՆ զինված ուժերի պատմության մեջ ցանկացած այլ օդային արշավի սկիզբ։ Ընդամենը չորս օրում սպառվել է 35 տարբեր տեսակի 5197 զինամթերք, իսկ զինանոցի միայն այս մասի համալրման հաշիվը կազմել է 10-ից մինչև 16 միլիարդ դոլար։

Հունվարին Lockheed Martin-ը շրջանակային համաձայնագիր է ստորագրել ԱՄՆ պաշտպանության նախարարության հետ, որը նախատեսում է THAAD հակահրթիռների արտադրության ավելացում ավելի քան չորս անգամ՝ տարեկան 96-ից հասցնելով 400 միավորի։

Գիտակցելով իրավիճակի հրատապությունը՝ Lockheed Martin-ի տնօրենների խորհրդի նախագահ, նախագահ և գլխավոր տնօրեն Ջիմ Թայքլեթը Տրոյում տեղի ունեցած արարողության ժամանակ հայտարարել է, որ ընկերությունն «արդեն իսկ պատրաստ է բավարարել արտադրական հզորությունների ընդլայնման հրատապ պահանջարկը»։

«Մենք արդեն զգալիորեն ավելի քան մեկ միլիարդ դոլար ենք ներդրել այս ընդլայնման համար, ինչն ուղղակիորեն աշխատում է զսպման ներուժի ամրապնդման ուղղությամբ և օգնում է երաշխավորել, որ մեր զինծառայողներն ու դաշնակիցները կստանան իրենց անհրաժեշտ հնարավորությունները հենց այն ժամանակ, երբ դրանց կարիքն ունեն»,- ընդգծել է կորպորացիայի ղեկավարը։

Source: https://news.am/hy/news/1038241