«Իրանի հետ կապ ունեցող ենթադրյալ գործակալը» ծրագրել էր սպանել Իվանկա Թրամփին՝ ցանկանալով վրեժխնդիր լինել 2020 թվականին ԱՄՆ-ի կողմից իրանցի գեներալ Քասեմ Սուլեյմանիի սպանության համար։ Այս մասին հայտնում է The New York Post պարբերականը։

Ինչպես նշում է թերթը՝ հղում անելով իր աղբյուրներին, Իրաքի 32-ամյա քաղաքացի Մոհամմադ Բաքեր Սաադ Դավուդ ալ-Սաադին, ըստ ամենայնի, «երդվել էր» սպանել ԱՄՆ նախագահ Դոնալդ Թրամփի դստերը և նույնիսկ ունեցել է Ֆլորիդայում գտնվող նրա առանձնատան հատակագիծը։

Թերթի պնդմամբ՝ ալ-Սաադին ցանկացել է վրեժխնդիր լինել նախագահի ընտանիքից՝ Բաղդադում ամերիկյան անօդաչու թռչող սարքի հարվածի հետևանքով զոհված Սուլեյմանիի համար։

Հաղորդվում է նաև, որ Վաշինգտոնում Իրաքի դեսպանատան ռազմական կցորդի նախկին տեղակալ Էնտիֆադ Քանբարը թերթին հայտնել է, որ ալ-Սաադին Սուլեյմանիի մահից հետո խոսել էր Իվանկա Թրամփի սպանության մասին։

Հոդվածում նաև նշվում է, որ ալ-Սաադին արաբերենով սպառնալիք է հրապարակել, ինչպես նաև Ֆլորիդայի այն տարածքի քարտեզը, որտեղ գտնվում է Իվանկա Թրամփի և նրա ամուսնու՝ Ջարեդ Քուշների առանձնատունը։

Ալ-Սաադին ձերբակալվել է Թուրքիայում մայիսի 15-ին և արտահանձնվել Միացյալ Նահանգներին։ Այնտեղ նրան մեղադրում են Եվրոպայում և ԱՄՆ-ում իրականացված 18 հարձակումների ու ահաբեկչության փորձերի մեջ ներգրավվածության համար։

Զեկույցում նա ներկայացվում է որպես թե՛ «Քաթայիբ Հեզբոլլահի», թե՛ Իրանի Իսլամական հեղափոխության պահապանների կորպուսի (ԻՀՊԿ) ենթադրյալ գրոհային։ Ըստ աղբյուրի՝ նա կապ է ունեցել ամերիկյան և հրեական օբյեկտների վրա կատարված հարձակումների հետ, այդ թվում՝ Ամստերդամում, Լոնդոնում, Տորոնտոյում, Բելգիայում և Նիդերլանդներում տեղի ունեցած միջադեպերի հետ։

Թերթը նաև հայտնում է, որ ալ-Սաադին, ըստ ամենայնի, կրոնական տուրիստական գործակալություն է օգտագործել՝ միջազգային ուղևորություններ կատարելու և գրոհայինների բջիջների հետ կապեր հաստատելու համար։

Source: https://news.am/hy/news/1037726