ԱՄՆ-ում գյուղատնտեսական արտադրողները բախվել են ծախսերի աճին՝ Իրանի շուրջ հակամարտության հետևանքների պատճառով, ինչը հանգեցրել է վառելիքի թանկացման և պարարտանյութերի մատակարարման խափանումների, հաղորդում է CBS News-ը։
Լուիզիանա նահանգում գյուղատնտեսական օդաչու Ռիդ Կիհեյը, որը օդից մշակում է դաշտերը, ստիպված է զգալիորեն ավելի շատ վճարել Jet-A ավիացիոն վառելիքի համար։ Փետրվարին՝ մինչև պատերազմի սկիզբը, մեկ գալոն վառելիքն արժեր մոտ 2,46 դոլար, սակայն մայիսին գինը բարձրացավ մինչև 4,11 դոլար։
Կիհեյը վառելիք է գնում 7,5 հազար գալոնանոց խմբաքանակներով։ Առավելագույն գնով մեկ լիցքավորումն արժեցել է ավելի քան 30 հազար դոլար։ Այս շաբաթ արժեքը նվազել է մոտ 3,18 դոլարի մեկ գալոնի դիմաց, սակայն կրկին սկսել է աճել։
«Սա ճնշում է ստեղծում բիզնեսի վրա, բայց ես չեմ կարող թույլ տալ, որ իմ ֆերմերներն էլ զգան այն նույն ճնշումը, որը ես եմ զգում»,- հայտարարել է Կիհեյը։
Գյուղատնտեսների համար լրացուցիչ խնդիր են դարձել նաև պարարտանյութերի գները։ Լուիզիանայում եգիպտացորեն աճեցնող ֆերմերներ Դևիդ և Թերեզա Գեռերոնները բախվել են կարբամիդի (միզանյութի)՝ բերքի համար անհրաժեշտ ազոտական պարարտանյութի, արժեքի կտրուկ աճին։
Միզանյութի համաշխարհային արտահանման մոտ կեսն անցնում է Պարսից ծոցի երկրների միջոցով, իսկ Հորմուզի նեղուցում նավագնացության ճգնաժամը, որով անցնում է համաշխարհային նավթի մատակարարումների զգալի մասը, խախտել է առևտրային շղթաները։
Գեռերոների վկայությամբ, գների աճն ամբողջությամբ սպառել է իրենց պարարտանյութերի բյուջեն։ Այժմ տնտեսությունը գերազանցում է պլանավորված ծախսերը մոտ 120–130 հազար դոլարով։
«Ամեն ինչ սահմանագծին է։ Մենք իսկապես շատ մոտ ենք սահմանին»,- ասել է ֆերմերը՝ պատասխանելով այն հարցին, թե արդյոք իր տնտեսությունը կկարողանա դիմանալ ծախսերի աճին։
Ամերիկյան ֆերմերային բյուրոների ֆեդերացիայի տվյալներով, ԱՄՆ-ում ֆերմերային տնտեսությունների սնանկությունների թիվն անցյալ տարի աճել է 46%-ով՝ 2024 թվականի համեմատ։
Կիհեյը կարող էր լրացուցիչ ծախսերը փոխանցել ֆերմերներին՝ բարձրացնելով դաշտերի մշակման արժեքը, սակայն առայժմ ծախսերի մի մասը վերցնում է իր վրա։
«Հիմա սա գոյատևման խաղ է։ Եթե ֆերմերները չկարողանան աշխատել, ես նույնպես չեմ կարողանա աշխատել»,- նշել է նա։
Source: https://news.am/hy/news/1049376