Իրանի արտաքին գործերի նախարար Աբաս Արաղչին դատապարտել է Իրանի հասցեին Եվրոպական միության հայտարարությունները մարդու իրավունքների պաշտպանության պատրվակով՝ նշելով, որ այդ միությունը որևէ բարոյական հիմք չունի ուրիշներին խրատելու համար, հաշվի առնելով մարդու իրավունքների ոլորտում իր սեփական անցյալը։
Արաղչին այս հայտարարություններն արել է իր հույն գործընկեր Գեորգիոս Գերապետրիտիսի հետ հեռախոսազրույցում, որի ընթացքում կողմերը քննարկել են երկկողմ հարաբերությունները, ինչպես նաև տարածաշրջանային և միջազգային զարգացումները։
Արաղչին մատնանշել է ԱՄՆ-ի կողմից Իրանի դեմ ապօրինի և ագրեսիվ գործողությունների շարունակությունը, ներառյալ շարունակվող ռազմածովային շրջափակումը և հունիսի 18-ի պայմանավորվածությունների խախտումը՝ ընդգծելով Իրանի վճռականությունը՝ պաշտպանելու իր ազգային շահերն ու անվտանգությունը։
Իրանի ԱԳՆ ղեկավարը նաև ներկայացրել է Օմանի հետ երկկողմ բանակցությունների ընթացիկ վիճակը՝ Հորմուզի նեղուցով նավերի տարանցման անվտանգ երթուղիները սահմանելու վերաբերյալ։ Նա այս ռազմավարական ջրուղում անկայունությունը բնութագրել է որպես ԱՄՆ-ի և Իսրայելի կողմից Իրանի դեմ ռազմական ագրեսիայի անմիջական հետևանք՝ ընդգծելով, որ միջազգային հանրությունը պետք է պատասխանատվության ենթարկի ագրեսորներին և միջազգային իրավունքը խախտողներին ստեղծված իրավիճակի համար։
Այնուհետև Արաղչին քննադատել է Եվրամիության «երկակի չափանիշներն ու կեղծավորությունը» մարդու իրավունքների հարցում, մասնավորապես՝ որոշ եվրոպական երկրների՝ «սիոնիստական ռեժիմին» ցուցաբերվող համակողմանի աջակցությունը և նրանց անտարբերությունը պաղեստինցիների ցեղասպանության ու Լիբանանում և Իրանում իսրայելական ռեժիմի իրականացրած ռազմական հանցագործությունների նկատմամբ։
Նա մերժել է մարդու իրավունքների պատրվակով Իրանի դեմ ԵՄ միջամտողական հայտարարությունները՝ ընդգծելով, որ «Եվրոպական միությունը մարդու իրավունքների ոլորտում իր գործելակերպի պատճառով որևէ բարոյական իրավունք չունի ուրիշներին խրատելու»։
Գերապետրիտիսը, իր հերթին, աջակցություն է հայտնել լարվածության նվազեցմանն ուղղված դիվանագիտական ջանքերին և հայտարարել, որ Հունաստանը պատրաստ է տրամադրել ցանկացած տեխնիկական և փորձագիտական օգնություն։
Կողմերը նաև ընդգծել են առկա խորհրդակցությունների շարունակման անհրաժեշտությունը և Իրանի ու Հունաստանի միջև վաղեմի հարաբերությունների պահպանման կարևորությունը։
Source: https://news.am/hy/news/1055459