Հունաստանի դատախազությունը երեք ձերբակալվածների մեղադրանքներ է առաջադրել հինգ առանձնապես ծանր հոդվածներով, այդ թվում՝ դիտավորությամբ սպանության, սպանության փորձի և ահաբեկչական կազմակերպությանը մասնակցության համար։ Գործը կապված է Աֆրոդիտա Նեստորայի ընտանիքի տան հրկիզման հետ։ Նա իշխող «Նոր ժողովրդավարություն» կուսակցության ներկայացուցիչ է և խորհրդարանի պատգամավորի նախկին թեկնածու, հաղորդում է Kathimerini-ն։
Միջադեպը տեղի է ունեցել հուլիսի 1-ին Սալոնիկում։ Հրդեհի հետևանքով մահացել է Նեստորայի 75-ամյա մայրը՝ Վագիա Նեստորան։ Քաղաքական գործչի հայրը և բազմաբնակարան շենքի ևս երկու բնակիչ ստացել են վնասվածքներ։
Շաբաթ օրը դատախազի առջև ներկայացել են երեք կասկածյալներ՝ 29 և 24 տարեկան երկու տղամարդ, ինչպես նաև 26-ամյա մի կին։
Հունաստանի հակաահաբեկչական ստորաբաժանման տվյալներով, քննությունը հավաքված ապացույցների և տեսահսկման տեսախցիկների գրառումների հիման վրա պարզել է հարձակման ենթադրյալ մասնակիցների ինքնությունը։ 29-ամյա տղամարդն ու 26-ամյա կինը կասկածվում են հրկիզումն անմիջականորեն կատարելու մեջ։ 24-ամյա տղամարդը մեղադրվում է այն բանում, որ նրանց տրամադրել է իր բնակարանը՝ գործողությունը նախապատրաստելու և հարձակումից հետո թաքնվելու համար։
Կասկածյալներին Սալոնիկի դատարանի շենք հասցնելուց հետո ոստիկանությունն ուժեղացրել է անվտանգության միջոցառումները։ Դատարանի շրջակայքում զգալի թվով իրավապահներ են տեղակայվել այն բանից հետո, երբ անարխիստական շարժման ներկայացուցիչները կոչ են արել բողոքի ակցիա անցկացնել։
Source: https://news.am/hy/news/1049355