Շվեդիան լայնածավալ կերպով ուժեղացնում է Բալթիկ ծովում գտնվող ռազմավարական Գոտլանդ կղզու պաշտպանությունը՝ մտահոգվելով Ռուսաստանի կողմից հնարավոր սպառնալիքով։ Կղզին դիտարկվում է որպես Բալթիկ տարածաշրջանի և ՆԱՏՕ-ի երկրների մատակարարման գծերի վերահսկման առանցքային օբյեկտ, գրում է The Guardian-ը։
19-ամյա նորակոչիկ զինծառայող Էլլա Ադմանը անցնում է 15-ամսյա պարտադիր ծառայություն և շուտով կուղարկվի Ստոկհոլմ՝ թագավորական ընտանիքի պահպանությունն ապահովելու համար։ Նա այն հարյուրավոր զորակոչիկներից է, որոնք ուղարկվել են Գոտլանդ՝ ռազմական ներկայության ընդլայնման շրջանակում։
2005 թվականին վերջին գնդի լուծարումից հետո կղզում ռազմական ներկայությունը վերականգնվել է 2018 թվականին և կտրուկ ընդլայնվել Ռուսաստանի՝ Ուկրաինայի դեմ լայնածավալ պատերազմի սկսվելուց հետո։ Այժմ Գոտլանդը կրկին ունի բանակի կանոնավոր ներկայություն և օգտագործվում է ՆԱՏՕ-ի զորավարժությունների համար։
Շվեդիայի հրամանատարությունը կղզին դիտարկում է որպես պաշտպանության խիստ կարևոր տարր. դրա նկատմամբ վերահսկողությունը թույլ է տալիս վերահսկել Բալթիկ ծովի օդային և ծովային երթուղիները, ինչպես նաև մուտքը դեպի Բալթյան երկրներ։ Ռազմական հրամանատարության համոզմամբ, առաջնահերթությունը հակամարտության դեպքում կղզու պահպանումն է։
Ներկայիս փուլում դասական ներխուժման անմիջական սպառնալիք չի արձանագրվում, սակայն հնարավոր են դիվերսիաներ և հետախուզական ակտիվություն։ Երկարաժամկետ հեռանկարում ռիսկը կապվում է տարածաշրջանում ռուսական ուժերի հնարավոր վերախմբավորման հետ՝ Ուկրաինայի շուրջ իրավիճակի փոփոխության դեպքում։
Շվեդիան մինչև 2026 թվականը մեծացնում է պաշտպանական ծախսերը մինչև ՀՆԱ-ի 2,8%-ը, իսկ 2028 թվականից հետո՝ մինչև 3,1%-ը, ընդլայնում է զորակոչի համակարգը և արդիականացնում զինված ուժերը։ Միևնույն ժամանակ պահպանվում են սպառազինության գնման դժվարությունները՝ ՆԱՏՕ-ի երկրներում բարձր պահանջարկի պատճառով։
Զուգահեռաբար զարգացվում է քաղաքացիական պաշտպանության համակարգը։ Գոտլանդում ներդրվում են ինքնաբավության ծրագրեր՝ ջրի, էներգիայի և կապի ռեսուրսների հաշվառում, բնակչության աջակցության տեղական կենտրոնների ստեղծում, ճգնաժամի դեպքում կղզու հնարավոր մեկուսացման նախապատրաստություն։ Բնակիչներին խորհուրդ է տրվում ունենալ պաշարներ և ինքնուրույն գոյատևման ծրագրեր։
Քաղաքացիական պաշտպանությունը ներառում է զանգվածային տարհանման, մեծ կորուստների դեպքում բժշկական օգնության և ռազմական գործողությունների հետևանքների վերացման սցենարներ։ Կղզին դիտարկվում է որպես Շվեդիայի համընդհանուր պաշտպանության համակարգի կառուցման մոդել։
Շվեդական իշխանությունների գնահատմամբ, Գոտլանդը պետք է միաժամանակ դառնա ՆԱՏՕ-ի ռազմական և քաղաքացիական հենակետը Բալթիկ տարածաշրջանում՝ ապահովելով կայունություն հակամարտության դեպքում։
Source: https://news.am/hy/news/1047972