Հունգարիայի առաջընթացը նոր կառավարության օրոք բարեփոխումներ իրականացնելու գործում Եվրոպական հանձնաժողովին թույլ կտա վերականգնման և տարածաշրջանային զարգացման հիմնադրամներից ապաշրջափակել Եվրամիության՝ նախկինում սառեցված 16,4 միլիարդ եվրոն։ Այս մասին հայտնել է Եվրահանձնաժողովի նախագահ Ուրսուլա ֆոն դեր Լյայենը, հաղորդել է Reuters-ը։

Հունգարիայի վարչապետ Պետեր Մադյարի հետ հանդիպումից հետո ֆոն դեր Լյայենը լրագրողներին հայտնել է, որ ԵՄ-ը կապաշրջափակի 10 միլիարդ եվրո Next Generation EU վերականգնման հիմնադրամից, ինչպես նաև 4,2 միլիարդ եվրո՝ տարածաշրջանային զարգացման հիմնադրամներից։ Եվս 2,2 միլիարդ եվրո կհատկացվի մնացած բարեփոխումների ավարտից հետո։

«Կարող եմ հաստատել, որ խոսքը վերաբերում է 10 միլիարդ եվրոյին, որոնք արդեն ապաշրջափակվել կամ ապաշրջափակվելու են Next Generation EU հիմնադրամից, ապա՝ 4,2 միլիարդ եվրո՝ համախմբման հիմնադրամների պայմանականության մեխանիզմի շրջանակում, և ևս 2,2 միլիարդ եվրո՝ կապված ակադեմիական ազատության հետ։ Ընդհանուր առմամբ, 16,4 միլիարդ եվրո է», — հայտնել է Ուրսուլա ֆոն դեր Լյայենը։

«Սա հսկայական գումար է, բայց հունգար ժողովուրդը դրան արժանի է։ Եվս մեկ անգամ մեծ շնորհակալություն կատարված բացառիկ աշխատանքի համար», — ավելացրել է նա։

ԵՄ միջոցները չափազանց կարևոր են համարվում հունգարական տնտեսության վերագործարկման համար, որը փաստացի գրեթե երեք տարի գտնվում է լճացման վիճակում։

Նոր կառավարությունը ժառանգել է աճող բյուջետային դեֆիցիտ։ Եվրահանձնաժողովի գնահատմամբ՝ 2026 թվականին այն կարող է հասնել ՀՆԱ 6,2 տոկոսին՝ նախկին վարչապետ Վիկտոր Օրբանի նախընտրական լայնածավալ ծախսերից հետո, որը պարտվել էր անցյալ ամիս կայացած ընտրություններում։

Source: https://news.am/hy/news/1039418