Եվրոպական հանձնաժողովը վերջնականապես հաստատել է 2 մլն եվրոյի դրամաշնորհի հետկանչը, որը հատկացվել էր Վենետիկի բիենալեին 2025–2028 թվականների ժամանակահատվածի համար, հայտնում է Euronews-ը։
Որոշումը կապված է ռուսաստանյան տաղավարի ցուցահանդես վերադարձի հետ՝ դադարից հետո, որը պայմանավորված էր Ուկրաինայում պատերազմով և Մոսկվայի դեմ ԵՄ պատժամիջոցների սահմանմամբ։
Ժողովրդավարության հարցերով եվրահանձնակատար Հեննա Վիրկկունենը հայտարարել է, որ Եվրոպայում մշակույթը, որը ֆինանսավորվում է հարկատուների միջոցների հաշվին, պետք է աջակցի և պաշտպանի ժողովրդավարական արժեքները, հայտնում է Euronews-ը։
Ըստ նրա, այդ արժեքներն «այսօր Ռուսաստանում չեն պահպանվում»։
Ֆինանսավորման հետկանչի ընթացակարգը սկսվել էր ապրիլին այն բանից հետո, երբ Վենետիկի բիենալեի հիմնադրամի նախագահ Պիետրանջելո Բուտտաֆուոկոն հաստատել էր ռուսաստանյան տաղավարի բացումը ընթացիկ միջոցառման շրջանակում։ Ավելի վաղ ռուսաստանյան ցուցասրահը փակ էր մնացել 2022 և 2024 թվականներին։
Եվրահանձնաժողովը կազմակերպիչներից պարզաբանումներ էր խնդրել Ռուսաստանի մասնակցության բնույթի վերաբերյալ, սակայն հիմնադրամը որոշել էր շարունակել տաղավարի նախապատրաստումը։ Միաժամանակ ռուսաստանյան հարթակը կարողացավ գործել միայն սահմանափակ ձևաչափով, քանի որ չէր ստացել հանրային միջոցառումներ անցկացնելու համար անհրաժեշտ թույլտվությունները։
Բրյուսելի որոշումը քննադատության է արժանացել իտալական մի շարք քաղաքական ուժերի կողմից։ «Լիգա» կուսակցությունը հայտարարել է, որ կարող է կոչ անել Ջորջիա Մելոնիի կառավարությանը ազգային բյուջեից փոխհատուցել կորցրած ֆինանսավորումը։
Ռուսաստանի մասնակցության կողմնակիցները պնդում են, որ մշակույթը պետք է անկախ լինի քաղաքական որոշումներից, մինչդեռ ԵՄ-ում կարծում են, որ մշակութային նախագծերի պետական ֆինանսավորումը չի կարող օգտագործվել Ուկրաինայի դեմ պատերազմի ֆոնին Ռուսաստանի հետ կապված հարթակներին աջակցելու համար։
Source: https://news.am/hy/news/1049423