Ռոտերդամի և Զվեյնդրեխտի միջև ընկած երկաթուղային գծի մալուխային անցուղում բռնկված հրդեհը հանգեցրել է երկաթուղային հաղորդակցության լուրջ խափանումների, հաղորդում է NOS-ը։
Առաջիկա օրերին Ամստերդամի և Լոնդոնի միջև միջազգային գնացքները չեն գործի։ Գնացքների ուշացումներ են սպասվում նաև դեպի Բրյուսել և Փարիզ տանող երթուղիներում։
Ինչպես հայտնել է Eurostar օպերատորը, Նիդերլանդների իշխանությունները շարունակում են վերականգնողական աշխատանքները և նախատեսում են վթարի հետևանքները լիովին վերացնել ոչ շուտ, քան հուլիսի 3-ը։
Մեծ Բրիտանիայից մեկնող գնացքները ժամանակավորապես ընթանում են միայն մինչև Բրյուսել և չեն շարունակում ճանապարհը դեպի Նիդերլանդներ։ Այն ուղևորները, որոնք տոմսեր են գնել Ամստերդամ/Ռոտերդամ-Լոնդոն երթուղիների համար, կարող են ուղևորության արժեքի ամբողջական վերադարձ ձևակերպել։
Նիդերլանդների, Բրյուսելի և Փարիզի միջև գնացքներն ուղարկվում են շրջանցիկ ճանապարհով՝ Ուտրեխտի վրայով։ Eurostar-ի տվյալներով՝ այս ուղղություններով ուշացումները չպետք է գերազանցեն մեկ ժամը։
Ընկերությունը ուղևորներին խորհուրդ է տալիս մինչև հուլիսի 3-ը Նիդերլանդների և Մեծ Բրիտանիայի միջև ուղևորություններ կատարել միայն խիստ անհրաժեշտության դեպքում և, հնարավորության դեպքում, հետաձգել ճանապարհորդությունը ավելի ուշ ժամկետի։ Նրանց, ովքեր կորոշեն հրաժարվել ուղևորությունից, խոստանում են միջոցների ամբողջական վերադարձ՝ առանց հավելյալ վճարների։
Eurostar-ում ափսոսանք են հայտնել պատճառված անհանգստության համար և վստահեցրել, որ ընկերության աշխատակիցներն անում են հնարավոր ամեն ինչ՝ ուղևորներին օգնելու և նրանց նշանակման վայր հասցնելն առավելագույնս բարենպաստ պայմաններում ապահովելու համար։
Նշվում է, որ սա վերջին շրջանում Eurostar գնացքներին առնչվող արդեն երկրորդ լուրջ միջադեպն է։ Անցյալ շաբաթ 400 ուղևորով գնացքը կանգ էր առել բելգիական Լյովեն քաղաքի մոտակայքում, իսկ երեք ուղևոր կանխարգելիչ նպատակներով հոսպիտալացվել էր։
Source: https://news.am/hy/news/1046977