Տեղեկացնում ենք, որ «Դիլի» կաթնամթերքի գործարանը վերսկսում է իր արտադրական գործունեությունը և ողջ ծավալով վերադառնում է շուկա։
Մեզ համար այս վերադարձը միայն արտադրանքի մատակարարման վերականգնում չէ։ Այն մեր երկարամյա սկզբունքների՝ անարատ կաթի, մաքուր հումքի, վերահսկվող արտադրական շղթայի և սպառողի վստահության նկատմամբ պատասխանատու վերաբերմունքի շարունակությունն է։
Վերջին շրջանում ընկերության թիմն իրականացրել է անհրաժեշտ ներքին աշխատանքներ և արտադրական վերահսկողության ուժեղացման քայլեր։ Ընկերությունն անցել է նաև անկախ լաբորատոր փորձաքննության փուլ, որի արդյունքում խախտումներ չեն արձանագրվել, ինչպես նաև լրացուցիչ տեսչական դիտարկումների գործընթաց։ Այդ գործընթացը մեզ համար կարևոր հնարավորություն էր ոչ միայն ամփոփելու իրականացված աշխատանքը, այլ նաև համոզվելու, որ պատասխանատու մոտեցումը, հետևողական վերահսկողությունը և որակի նկատմամբ մեր պահանջկոտությունը գործում են ոչ թե միայն որպես սկզբունք, այլ որպես ամենօրյա աշխատանքային համակարգ։
Մեզ համար կարևոր էր շուկա վերադառնալ ոչ թե պարզապես արագ, այլ կազմակերպված, պատասխանատու և մեր որակի սկզբունքներին լիովին համապատասխան ձևով։
«Դիլի»-ի արտադրական մոտեցման հիմքում միշտ եղել է պարզ գաղափար․ կաթնամթերքը միայն արտադրանք չէ, այլ հոգատարություն մարդու առողջության, ընտանիքի առօրյայի և սպառողի վստահության նկատմամբ։ Մեզ համար այդ վստահությունը սկսվում է ֆերմայից, անցնում վերահսկվող արտադրական շղթայով և հասնում սպառողի սեղանին՝ որպես երկարաժամկետ պատասխանատվություն։ Հենց այս մոտեցումն է ընկած մեր աշխատանքի հիմքում։
Արդեն իսկ «Դիլի»-ի արտադրանքը կրկին հասանելի է վաճառքի կետերում՝ ըստ մատակարարման ժամանակացույցի, իսկ արտադրական նորությունների և տեսականու ընդլայնման մասին ընկերությունը կտեղեկացնի առանձին։ Սպասեք հաճելի անակնկալների։
Շնորհակալ ենք մեր սպառողներին, գործընկերներին և վաճառքի կետերին վստահության, համբերության և «Դիլի»-ի կողքին լինելու համար։
Source: https://news.am/hy/news/1049790