Բոլիվիայում հանրային աշխատանքների նախարար Մաուրիսիո Սամորայի շարասյունը ենթարկվել է ցուցարարների հարձակմանը ճանապարհային շրջափակումների մաքրման գործողության ընթացքում, հաղորդում է BBC News-ը։

Հարձակումից հետո նախարարը որոշ ժամանակ անհետացած էր, սակայն ավելի ուշ իշխանությունները հաստատեցին, որ նա անվտանգ վայրում է։

Միջադեպը տեղի է ունեցել շաբաթ օրը Լա Պասից հարավ գտնվող Կոպատա բնակավայրի շրջանում։

Սամորան ղեկավարում էր, այսպես կոչված, «հումանիտար միջանցքների» ստեղծման գործողությունը՝ Բոլիվիայի վարչական մայրաքաղաք և հարևան Էլ Ալտո քաղաք սննդամթերքի ու դեղորայքի մատակարարումները վերականգնելու համար։

Տեղական ԶԼՄ-ների տվյալներով, շարասյան վրա հարձակվել են քարերով և դինամիտով։ Նախարարի մեքենան նահանջից հետո առանձնացել է հիմնական խմբից և փորձել է փախչել գրունտային ճանապարհով, սակայն նախքան կրկին շարասյանը միանալը ենթարկվել է ևս մեկ հարձակման։

Շաբաթ առավոտյան Բոլիվիայի իշխանությունները ոստիկանություն և զինվորականներ են ուղարկել՝ ապաշրջափակելու նախկին նախագահ Էվո Մորալեսի կողմնակիցների և արհմիութենական կազմակերպությունների կողմից փակված ճանապարհները։ Պատնեշների մաքրման համար օգտագործվել են բուլդոզերներ։

Սակայն մի շարք շրջաններում բախումները շարունակվել են, իսկ ցուցարարները կրկին վերականգնել են անցակետերը։ Աչիչա-Առիբա քաղաքում բողոքի ակցիայի մասնակիցները թալանել և հրկիզել են մաքսակետը այն բանից հետո, երբ ոստիկանությունը արցունքաբեր գազ էր կիրառել ցուցարարներին ցրելու համար։

Լա Պաս — Օրուրո մայրուղու վրա ցուցարարները պայթուցիկ սարքերով հարձակվել են շարասյունների վրա, այրել են զինվորական բեռնատարը և թալանել ոստիկանության բաժանմունքը։ Հրկիզվել է նաև միկրոավտոբուս։

Բողոքի ակցիաները շաբաթվա ընթացքում ուժգնացել են։ Ցուցարարները պահանջում են Բոլիվիայի նախագահ Ռոդրիգո Պասի հրաժարականը, որը իշխանության է եկել ընդամենը վեց ամիս առաջ։ Դժգոհության պատճառ են դարձել խիստ խնայողության միջոցառումները, այդ թվում՝ երկարամյա վառելիքային սուբսիդիաների չեղարկումը տնտեսական ճգնաժամի, գնաճի և վառելիքի պակասի ֆոնին։

Լարվածության լրացուցիչ գործոն է դարձել նոր կառավարության արտաքին քաղաքական ուղղվածությունը ԱՄՆ-ի հետ համագործակցության վրա, ինչը քննադատություն է առաջացնում ձախ շարժումների և Մորալեսի կողմնակիցների կողմից։

Ինքը՝ Մորալեսը, որի դեմ քննվում է գործ՝ իր նախագահության ժամանակահատվածում անչափահասի հետ ենթադրյալ կապի վերաբերյալ, աջակցել է բողոքի ակցիաներին։ Կառավարությունը նախկին առաջնորդին մեղադրում է անկարգությունների դրդման մեջ։

Նախագահ Պասը հայտարարել է, որ իշխանությունները շարունակում են հնարավորություններ որոնել ցուցարարների հետ երկխոսության համար, սակայն ընդգծել է. «Ամեն ինչ սահման ունի»։

Source: https://news.am/hy/news/1037952