Մեծ Բրիտանիայի կառավարությունը լրացուցիչ 36 միլիոն ֆունտ ստերլինգով (50 միլիոն դոլար) ձեռք կբերի Martlet բազմապատակային հրթիռներ, որոնք հայտնի են նաև որպես Lightweight Multirole Missiles (LMM)։ Այս քայլն ուղղված է Իրանում պատերազմի հետևանքով սպառված սպառազինության պաշարների համալրմանը և Մերձավոր Արևելքում բրիտանական ռազմական օբյեկտների պաշտպանության ուժեղացմանը։ Այս մասին հայտնել է Միացյալ Թագավորության պաշտպանության նախարարությունը։

Նշվում է, որ մատակարարումները զորքերին կսկսվեն առաջիկա ամիսներին և կշարունակվեն ողջ տարվա ընթացքում։ Ռազմական գերատեսչությունից մատնանշել են, որ մարտ և ապրիլ ամիսներին Իրանում տեղի ունեցած պատերազմի ժամանակ LMM հրթիռներն օգնել են որսալ ավելի քան 100 անօդաչու թռչող սարքեր։ Հակամարտության ընթացքում Մեծ Բրիտանիան չէր միացել Իրանին հասցված ամերիկա-իսրայելական հարվածներին, սակայն մասնակցել էր Թեհրանի կողմից իրականացված պատասխան գրոհների հետմղմանը։

Պայմանագիրը կնքվել է Thales ընկերության հետ։ Հրթիռներն արտադրվում են Բելֆաստում գտնվող նրա ձեռնարկությունում։ Ընկերությունն այս հրթիռները ներկայացնում է որպես կիրառման լայն շրջանակ ունեցող զինամթերք. դրանք կարող են արձակվել ինչպես Rapid Sentry ՀՕՊ համալիրներից, այնպես էլ Wildcat ուղղաթիռներից։

Source: https://news.am/hy/news/1039988