Զբոսաշրջային քաղաքների մեծ մասում ցուցանակները տանում են դեպի պատմական տեսարժան վայրեր: Սակայն Պուերտո Բանուսում՝ Մարբելյայի հարևանությամբ գտնվող էլիտար թաղամասում (իսպանական Կոստա դել Սոլ ափին), դրանք ավելի շուտ ցույց են տալիս դեպի Bottega Veneta, Bvlgari, Louis Vuitton և Rolex բուտիկներ տանող ճանապարհը, գրում է Bloomberg գործակալությունը:
Ափամերձ գոտում շքեղ զբոսանավեր են կայանված, իսկ փողոցներով անցնում են Ferrari, Lamborghini և Bentley մակնիշի մեքենաներ: Շրջանը դարձել է Եվրոպայում հարստության և ցուցադրական շքեղության ամենաճանաչելի խորհրդանիշներից մեկը:
Մարբելյան արդեն մի քանի տասնամյակ գրավում է հարուստ օտարերկրացիներին։ 20-րդ դարի վերջին այստեղ ակտիվորեն տեղափոխվում էին Մեծ Բրիտանիայի և Սկանդինավիայի բնակիչները՝ գնելով ամառանոցներ կամ հաստատվելով մշտական բնակության: Միևնույն ժամանակ, քաղաքը հակասական համբավ է ձեռք բերել արդարադատությունից թաքնվող օտարերկրյա հանցագործների պատճառով, ինչի համար տարածաշրջանը ստացել է «Կոստա դել Կրիմեն» մականունը:
Վերջին տարիներին գնորդների կազմը փոխվել է. այստեղ ավելի հաճախ են գալիս գործարարներ, ներդրողներ և հարուստ ընտանիքներ ամբողջ աշխարհից։ Մարբելյայի շուրջը հայտնվում են նոր էլիտար բնակելի համալիրներ, փակ թաղամասեր և շքեղ առանձնատներ, որոնք աստիճանաբար տարածվում են դեպի շրջակա բլուրները:
Այսօր Մարբելյան արդեն ոչ միայն հանգստավայր է, այլև գերթանկարժեք անշարժ գույքի և միջազգային շքեղ զբոսաշրջության եվրոպական գլխավոր կենտրոններից մեկը։
Source: https://news.am/hy/news/1049420