2013 թվականին Ջորջթաունի համալսարանում ունեցած իր ելույթում նախագահ Բարաք Օբաման կտրուկ քննադատությամբ մերժեց նրանց, ովքեր ժխտում են կլիմայի փոփոխությունը. «Մենք ժամանակ չունենք Տափակ Երկրի ընկերության նիստերի համար»,- ասաց նա՝ նկատի ունենալով 70-ամյա պատմություն ունեցող կազմակերպությունը, որի հիմքում ընկած է այն համոզմունքը, թե Երկիրը տափակ է, այլ ոչ թե կլոր, և որ տիեզերքից մեր մոլորակի լուսանկարները, որոնք պատկերում են Երկիրը գնդի տեսքով, կեղծված են:

Այս տեսությունը համարվում է մարգինալ դավադրության տեսություն, որը մերժում է ամերիկացիների ճնշող մեծամասնությունը: Բայց այժմ պարզվել է, որ գոյություն ունի մի բան, որն էլ ավելի մարգինալ է՝ հավատը Դոնալդ Թրամփի «սնապարծության նախագծերի» հանդեպ:

CNN-ի գլխավոր տվյալների վերլուծաբան Հարրի Էնտենը երկուշաբթի հայտարարել է, որ ամերիկացիների միայն 10%-ն է հավատում, որ Երկիրը տափակ է, և փոքր-ինչ ավելին՝ 12%-ը, պնդում է, որ Լուսնի վրա վայրէջքը կեղծված է եղել: Բայց ի՞նչն է վայելում էլ ավելի քիչ ընդունելություն։ Կառավարական շենքերին Թրամփի անունը շնորհելը։ Ամերիկացիների միայն 9%-ն է ազգային մայրաքաղաքի արտաքին տեսքն իր ճաշակով փոխելու նրա լայնամասշտաբ նախագծի շրջանակում դաշնային շենքերը Դոնալդ Թրամփի պատվին վերանվանելը ճիշտ համարում:

«Այսպիսով, ավելի քիչ ամերիկացիներ են հենց հիմա ընդունելի համարում նախագահ Թրամփի անունը կառավարական շենքերի վրա փակցնելը, քան հավատում են դավադրության երկու տեսություններին՝ որ Երկիրը տափակ է կամ որ Լուսնի վրա վայրէջքը կեղծի) էր,- նշել է Էնտենը։ - Եվ երբ դուք հայտնվում եք այդ նշագծից էլ ցածր, հասկանում եք, որ անում եք մի բան, որը բոլորովին հասարակական համակրանք չի վայելում»։

«Բարեկամս, վե՛րջ տուր: Կենտրոնացի՛ր գնաճի վրա, կենտրոնացի՛ր տնտեսության վրա»

Այն դեպքում, երբ նախագահը հիմնականում ձեռքը թափ է տալիս գների աճի ՝ հատկապես առաջին անհրաժեշտության ապրանքների, մասնավորապես՝ վառելիքի ու սննդի շուրջ մտահոգությունների նկատմամբ, ամերիկացիները կարծում են, որ նա բոլորովին սխալ է դասավորել առաջնահերթությունները: Ընտրված լինելով գնաճը նվազեցնելու խոստումների ֆոնին՝ Թրամփը կարծես տարված է ամբողջ երկրում իր ժառանգությունը և իր դեմքը թողնելու գաղափարով՝ սկսած վիթխարի կամարից մինչև Սպիտակ տան պարասրահը և նույնիսկ իր պատկերով 250 դոլարանոց թղթադրամը։ Եվ դա՝ հակառակ 1866 թվականից գործող օրենքի, որն արգելում է ողջ մարդկանց դիմանկարների տեղադրումը ամերիկյան արժույթի վրա:

«Կարծում եմ՝ դա խորհրդանշական է։ Նախագահ Թրամփը ստանձնում է պաշտոնը մեր 250-ամյակի շրջանում,- Fox News-ի Sunday Morning Futures ծրագրի եթերում հայտարարել է ֆինանսների նախարար Սքոթ Բեսենթը՝ հավելելով, որ Թրամփի պատկերով թղթադրամ տպելու համար անհրաժեշտ կլինի համապատասխան օրենք ընդունել։

CNN-ից Էնտենը նշել է, որ ամերիկացիների միայն 29%-ն է հավատում, որ նախագահը կենտրոնացած է այն հարցերի վրա, որոնք ամենից շատ են հուզում ընտանիքներին: «Ակնհայտ մեծամասնությունը, ավելի քան երկու երրորդը (68%), ասում է. «Ո՛չ, նա բավարար չափով կենտրոնացած չէ»,- ընդգծել է Էնտենը։ - Եվ հենց դա է պատճառը, որ մի քանի հարցումներում նրա վարկանիշը նվազել է մինչև 30-անոց տոկոսային նշագծեր, որովհետև նա կենտրոնացած է ոչ ճիշտ խնդիրների վրա»։

Էնտենը նույնիսկ հղում է արել մեծագույն բասկետբոլիստ Մայքլ Ջորդանի խոսքին. «Բարեկամս, վե՛րջ տուր: Դադարեցրո՛ւ: Կենտրոնացի՛ր գնաճի վրա, կենտրոնացի՛ր տնտեսության վրա, և այդ ժամանակ, հնարավոր է, քո վարկանիշը բարձրանա 40%-ից»,- ասել է նա։

Ու մի՛ ծիծաղիր, Կոնգրե՛ս, քո գործերն էլ լավ չեն:

Որքանո՞վ է զարմանալի այս 10-տոկոսանոց աջակցությունը։ Էնտենը մատնանշել է, որ ԱՄՆ Կոնգրեսը էլ ավելի քիչ աջակցություն է վայելում, քան Լուսնի վրա վայրէջքի կեղծման մասին տեսությունը։ «Ձեզ սովորաբար չեն սիրում,- դիմել է Էնտենը Կոնգրեսին,- բայց սովորաբար ոչ այդ աստիճան»։

Ըստ Էնտենի՝ Կոնգրեսի հանդեպ անվստահության մակարդակը հասել է ռեկորդային առավելագույնի՝ 86%-ի, ընդ որում՝ ամերիկացիների միայն 10%-ն է հավանություն տալիս նրա աշխատանքին։

«Վե՛ր կացեք և ծափահարե՛ք ինքներդ ձեզ,- հեգնանքով հավելել է Էնտենը Կոնգրեսի հասցեին։ - Ձեզ հաջողվեց դա անել՝ հավասարվել օրենսդիր մարմնից հասարակական դժգոհության բացարձակ ռեկորդին, որը սահմանվել էր 2013 թվականին։

Source: https://news.am/hy/news/1040095