ԱՄՆ զինված ուժերը կանգնեցրել և շարքից հանել են Գամբիայի դրոշի ներքո նավարկող առևտրանավը, որը, ամերիկյան ռազմական հրամանատարության տվյալներով, գործող ծովային շրջափակումը խախտելով՝ ուղևորվում էր դեպի իրանական նավահանգիստ։

Ինչպես հայտնել է ԱՄՆ Կենտրոնական հրամանատարությունը (CENTCOM), մայիսի 29-ին ամերիկյան ուժերը Օմանի ծոցի միջազգային ջրերում արձանագրել են M/V Lian Star նավի շարժը դեպի Իրան։ Զինվորականների պնդմամբ՝ անձնակազմին ուղարկվել է ավելի քան 20 նախազգուշացում՝ շրջափակման պայմանների խախտման մասին ծանուցմամբ։

Այն բանից հետո, երբ անձնակազմը չի կատարել ամերիկյան կողմի պահանջները, ԱՄՆ ինքնաթիռը Hellfire հրթիռով հարվածել է նավի մեքենայական բաժանմունքին։ Արդյունքում՝ նավը շարքից հանվել է և դադարեցրել է ընթացքը դեպի Իրան։

CENTCOM-ի տվյալներով՝ շրջափակման ռեժիմի գործողության սկզբից ի վեր ամերիկյան ուժերը շարքից հանել են հինգ առևտրանավ և վերուղղորդել ևս 116 նավ, որոնք փորձում էին ուղևորվել դեպի իրանական նավահանգիստներ։

Հրամանատարությունում նշել են, որ շրջափակման ապահովման միջոցները շարունակում են գործել՝ չնայած ԱՄՆ-ի և Իրանի միջև հրադադարի մասին պահպանվող համաձայնությանը։

Source: https://news.am/hy/news/1039700