ԱՄՆ պաշտպանության նախարարության ներկայացուցիչներն ուսումնասիրում են գործողությունների ծրագրերը Կուբայի դեմ հնարավոր ռազմական գործողությունների դեպքում, ներառյալ օդադեսանտային գործողությունը, թեև վերջնական որոշում դեռևս չի կայացվել։ Դրա մասին CBS News-ին հայտնել են քննարկումների ընթացքին ծանոթ մի քանի ամերիկացի պաշտոնյաներ։
Քննարկումներն անցկացվել են Հավանայի վրա Թրամփի վարչակազմի ճնշումների ուժեղացման ֆոնին, սակայն, ըստ պաշտոնյաների, Իրանի դեմ պատերազմի վերսկսումն այս պահին քիչ հավանական է դարձնում որևէ գործողություն Կուբայի դեմ։
Պաշտոնյաներն ընդգծել են, որ այդ ճեպազրույցները չեն վկայում այն մասին, թե Թրամփը կամ Պենտագոնը որոշում են ընդունել որևէ գործողություն իրականացնելու վերաբերյալ։
Կուբայի դեմ ցանկացած գործողություն Պենտագոնին կկանգնեցնի զգալի խնդրի առաջ, քանի որ ամերիկյան զինուժի ուշադրության մեծ մասը և նրանց առավել արժեքավոր հարձակողական կարողություններից մի քանիսն արդեն ներգրավված են այլ ոլորտներում։ Պետքարտուղար Մարկո Ռուբիոն ընդգծել է, որ ԱՄՆ-ը նախապատվությունը տալիս է տնտեսական բարեփոխումների պատրաստ տեխնոկրատների գլխավորությամբ նոր կառավարությանն անցնելու դիվանագիտական տարբերակին։
Անցյալ ամսվա վերջին ամերիկացի զինվորականները ճեպազրույց են անցկացրել՝ քննարկելու առանձին առաքելությունների համար նախնական ռազմական պլանավորման տարբերակները, հայտնել են պաշտոնյաները։ Նման ճեպազրույցները պարբերաբար անցկացվում են Պաշտպանության նախարարության և մարտական հրամանատարությունների կողմից տարբեր անկանխատեսելի իրավիճակների համար և դիտարկում են առաքելության նպատակները, զորքերի անհրաժեշտ քանակը, իրադարձությունների հաջորդականությունը, լոգիստիկ ասպեկտները և դրա հետ կապված ռիսկերը։
Պենտագոնը ավիացիան, հետախուզական ծառայությունները և այլ ռեսուրսներ աշխարհագրական այլ տարածաշրջաններից տեղափոխել է Մերձավոր Արևելք՝ Իրանի դեմ գործողություններին աջակցելու համար։ Պաշտոնյաները նշել են, որ այս պահին ուշադրությունը դեպի Կուբա վերակողմնորոշելը քիչ հավանական է՝ հաշվի առնելով անցյալ շաբաթ Իրանի դեմ ռազմական գործողությունների վերսկսումը։
Ինչպես հայտնում են իրավիճակին ծանոթ աղբյուրները, կուլիսներում Իրանի դեմ պատերազմը բացահայտել է որոշակի տարաձայնություններ նախագահ Թրամփի և Պաշտպանության նախարար Փիթ Հեգսեթի միջև։
Թեև Թրամփը ժամանակ առ ժամանակ գովել է Հեգսեթին և իր երկրորդ ժամկետի ընթացքում իրականացված տարբեր ռազմական գործողությունները, նա առանձնազրույցներում հիասթափություն է հայտնել «Էպիկական ցասում» (Epic Fury) գործողության ընթացքից։ Ըստ պաշտոնյաների՝ նախագահը կարծում է, որ վարչակազմը բաց է թողել այս տարվա սկզբին ձգձգվող հակամարտությունը կանխելու հնարավորությունը՝ մերժելով իր միջուկային ծրագիրը սահմանափակելու վերաբերյալ Իրանի առաջարկը։
Source: https://news.am/hy/news/1050058