Նախկինում, երբ մենք զենք էինք գնում ընդամենը մեկ-երկու երկրից, լինում էին վճռորոշ պահեր, երբ մեր մատակարարման ճանապարհները փակում էին։ Դեպքեր են եղել, երբ 100 միլիոնով փող ենք փոխանցել, բայց զենքը մեզ չեն տվել, մեզ ՀՀ-ի շահերին հակասող որոշում են պարտադրել։ Հունիսի 2-ին Գեղարքունիքի մարզի Սևան քաղաքում նախընտրական քարոզարշավի ժամանակ այս մասին հայտարարել է արձակուրդում գտնվող վարչապետ Նիկոլ Փաշինյանը, որը գլխավորում է ներկայումս կառավարող «Քաղաքացիական պայմանագիր» կուսակցության պատգամավորության թեկնութուների համամասնական ցուցակը։

Նա ընդգծել է, որ քաղաքացիների աջակցության շնորհիվ իրեն հաջողվել է ամուր կանգնել պետական շահերի պաշտպանության դիրքերում, և այսօր Հայաստանը զենք է գնում յոթ տարբեր երկրներից, քանի որ հանրապետության առջև բաց է սպառազինությունների միջազգային ողջ շուկան։ Փաշինյանի խոսքով՝ դիվերսիֆիկացումը առողջ մրցակցություն է ստեղծել. հենց Երևանը պայմանավորվածություն էր ձեռք բերում գործընկերներից մեկի հետ, շուկայում նրանց մրցակիցներն անմիջապես ավելի ձեռնտու պայմաններ ու գներ էին առաջարկում։ Ինչպես նշել է վարչապետը, այս մոտեցումն արտացոլում է նաև գյուղմթերքի ու ալկոհոլային խմիչքների արտահանման դիվերսիֆիկացմանն ուղղված իշխանությունների տնտեսական ռազմավարությունը, որպեսզի մեկ կոնկրետ երկիր արտահանվող ծավալները, ինչ-որ մեկի «վատ տրամադրության» դեպքում, չվերածվեն Հայաստանի վրա ճնշում գործադրելու լծակի։ «2021 թվականից ի վեր Կառավարությունը ռազմաարդյունաբերական համալիրում ներդրել է 170 միլիարդ դրամ, և այսօր մենք ունենք զարգացած ՌԱՀ, որի արտադրանքի հիմնական նմուշները քաղաքացիներն արդեն կարողացել են տեսնել զինվորական շքերթի ժամանակ»,- հայտարարել է Նիկոլ Փաշինյանը։

Նա հավելել է, որ ամեն անգամ, երբ Հանրապետության հրապարակում հայտարարվում էր հայրենական արտադրության տեխնիկայի անցնելու մասին, հրապարակը բառացիորեն թնդում էր ծափահարություններից։ Վարչապետը նաև հայտարարել է Մարզահամերգային համալիրում Հայաստանի պաշտպանական արդյունաբերության ցուցահանդեսի բացումը, որտեղ կցուցադրվի տեղական արտադրանքի էլ ավելի լայն տեսականի։ Միևնույն ժամանակ, Փաշինյանը հպարտությամբ ընդգծել է, որ հանրապետությունն արդեն սկսել է սեփական սպառազինությունն արտահանել զարգացած երկրներ՝ կնքելով տասնյակ միլիոնավոր դոլարների արժողությամբ առաջին պայմանագրերը։ «2021-ից 2025 թվականների ընթացքում մենք գիտության ֆինանսավորումն ավելացրել ենք 2,8 անգամ, գիտնականների աշխատավարձերը բարձրացրել ենք 100-300%-ով և 20 միլիարդ դրամ ենք հատկացրել գիտահետազոտական կազմակերպությունների վերազինմանը»,- նշել է նա՝ բացատրելով պաշտպանական ոլորտի հաջողությունները։

«ՔՊ» առաջնորդն ուշադրություն է հրավիրել այն փաստի վրա, որ այս քայլերի շնորհիվ արդեն իսկ հաջողվել է կանգնեցնել ժամանակին լայն թափ ստացած «ուղեղների արտահոսքը». հիմա հայ գիտնականները վերադառնում են Հայրենիք ու աշխատում երկրում։ Կառավարության ղեկավարը հայտնել է, որ մասնավոր հատվածի հետ համատեղ խնդիր է դրված մինչև 2031 թվականը գիտության ֆինանսավորումը հասցնել ՀՆԱ-ի 1%-ին։ Նիկոլ Փաշինյանի հավաստմամբ՝ նոր որակի պետության ստեղծումն անխուսափելիորեն կյանքի նոր ու ավելի բարձր որակ կապահովի Հայաստանի Հանրապետության բոլոր քաղաքացիների համար։

Source: https://news.am/hy/news/1040175