Արկածախնդիր իշխանությունները փորձանք է երկրի համար։ Այս մասին Ամասիայի բնակիչների հետ հանդիպման ժամանակ հայտարարել է Հայաստանի երկրորդ նախագահ, վարչապետի թեկնածու Ռոբերտ Քոչարյանը։

Քաղաքական գործչի խոսքով՝ նախընտրական արշավից այնպիսի տպավորություն է, ասես ոչ թե խորհրդարանական, այլ նախագահական ընտրություններ են սպասվում․ հռետորաբանությունն անձնավորված է, կոնկրետ «ՔՊ»-ն 1 մարդ է և 100 «ուսապարկ»։

Քոչարյանն ընդգծել է, որ կատարվողի արմատները տանում են դեպի Սահմանադրություն և կառավարման սուպերվարչապետական մոդել։ «Դա լավ տեղ չի տանելու։ Մեր նպատակն է փոխել ամեն ինչ և հանգել իշխանության ճիշտ բալանսավորված իշխանական համակարգի, սուպերվարչապետությունը չարիք է դարձել մեր երկրի համար»,- ընդգծել է Քոչարյանը։

Ամասիայում բնակիչներին մտահոգում են նույն խնդիրները, ինչ մարզի մյուս բնակավայրերում՝ անասնապահության ծավալների կրճատումը, դպրոցների փակումը, բնակչության արտահոսքը։ Լսելով բնակիչներին՝ Քոչարյանն ընդգծել է դպրոցներ փակելու անթույլատրելիությունը և հիշեցրել, որ իր կառավարման տարիներին շուրջ մեկուկես հարյուր դպրոց է կառուցվել։

Բնակչուհիներից մեկը դժգոհել է զոհվածների և անհայտ կորածների ընտանիքների հանդեպ պատշաճ վերաբերմունքի բացակայությունից։ Քաղաքական գործիչը համաձայնել է, որ այն վերաբերմունքը, որն իշխանությունները ցուցաբերում են զոհվածների և անհայտ կորածների ընտանիքների նկատմամբ, անընդունելի է։

Source: https://news.am/hy/news/1036639