Ռուսաստանի և Հայաստանի միջև հարաբերությունների հնարավոր խզումը աղետալի կլինի վերջինիս համար, քանի որ երկրի ողջ գյուղմթերքի 98%-ը և ալկոհոլային արտադրանքի ավելի քան 90%-ն արտահանվում է ռուսական շուկա, մինչդեռ Եվրամիության շուկան լիովին փակ է ու պաշտպանված և ունի գրեթե անհաղթահարելի արգելքներ։ Այս մասին ռուսական «ՌԲԿ» հեռուստաալիքին տված հարցազրույցում հայտարարել է Հայաստանի երկրորդ նախագահ Ռոբերտ Քոչարյանը, որը գլխավորում է «Հայաստան» դաշինքի պատգամավորության թեկնածուների համամասնական ցուցակը։

Քոչարյանն ընդգծել է, որ կապերի հիպոթետիկ խզման հետևանքները կործանարար կլինեն Երևանի համար, քանի որ ոչ ոք չգիտի, թե նման սցենարի դեպքում ուր է ուղղվելու ապրանքների այս հսկայական ծավալը, իսկ գործող իշխանությունը նույնիսկ չի էլ փորձում ցույց տալ, որ որևէ կոնկրետ ուղղություն ունի մտքում։ Մինչդեռ Մոսկվայի համար, նրա խոսքով, այդ քայլն աննկատ կանցնի, քանի որ ՌԴ արտաքին առևտրաշրջանառության մեջ Հայաստանի մասնաբաժինը կազմում է ընդամենը մոտ 0,7%, և ռուսական կողմը կկարողանա ակնթարթորեն փոխարինել այդ ապրանքներն այլ երկրների արտադրանքով, քանի որ բանջարեղենը, ծաղիկները և մնացած ամեն ինչ շատ արագ կփոխարինվեն։ Ռոբերտ Քոչարյանը հիմարություն է անվանել տնտեսական կապերի վրա խաղալու ցանկացած փորձ՝ նշելով. «Խաղալ այն ամենի հետ, ինչը կերակրում է քո տնտեսությանն ու զարգանալու հնարավորություն տալիս՝ պարզապես կարճատեսություն է»։

Պատասխանելով բուն Ռուսաստանի ներքին բյուջետային խնդիրների մասին հարցին՝ երկրի նախկին ղեկավարը պարզաբանել է, որ Հայաստանի տնտեսությունը կախված է ոչ թե ռուսական բյուջեից արվող ուղղակի ներարկումներից, այլ հսկայական շուկայի կայուն գործունեությունից՝ հավելելով. «Խոսքն այն մասին չէ, թե ռուսական բյուջեն ինչ-որ կերպ ֆինանսավորում է մեզ, խոսքը ռուսական ռուբլու մասին է, որը թույլ է տալիս շնչել Հայաստանի տնտեսությանը»։ Նրա խոսքով՝ այդ շուկան այնքան մեծ է, որ դրա գնողունակությունը կարող է միայն չնչին ազդեցություն ունենալ ներմուծման ծավալների վրա։ Քոչարյանը հայտարարել է, որ հարաբերությունների վատթարացումն անխուսափելիորեն կհանգեցնի գազի գնի բարձրացման։ «Գլխավոր հարցն այն է՝ նոր տեխնիկական ու տնտեսական պայմաններում մեր տնտեսությունները կմնա՞ն մրցունակ, թե՞ ոչ», - նշել է նա։

Երկրորդ նախագահը խիստ քննադատության է ենթարկել գործող կառավարությանը՝ հայտարարելով, որ «այսօր Հայաստանի կառավարությունը վարում է արտաքին քաղաքականություն, որը հակասում է երկրի տնտեսական շահերին», և հավելել, որ «սա միակ դեպքն է միջազգային պրակտիկայում»։ Նա նշել է, որ «Հայաստանը կդիմանա գազի գնի բարձրացմանը» ոճի դատողություններն անպատասխանատու են. «Դիմանալ, իհարկե, կարելի է, բայց հարց է առաջանում՝ ի՞նչ գնով»։ Ռոբերտ Քոչարյանն ընդգծել է, որ փոքր պետության համար հսկայական շուկայից ազատորեն օգտվելու հնարավորությունը սեփական արդյունաբերություն ունենալու և գյուղատնտեսությունը զարգացնելու միակ միջոցն է։ «Ներկա իրավիճակում Եվրամիությանն արագ անդամակցելու մասին ցանկացած խոսակցություն պարզապես գեղեցիկ հեքիաթ է, որի մասին, գուցե, օգտակար է երազել, բայց երբ որևէ քաղաքական գործիչ սկսում է ապրել աշխարհի մասին հեքիաթային պատկերացումներով, դրա գինը վճարում է ժողովուրդը», - եզրափակել է նախկին նախագահը։

Source: https://news.am/hy/news/1039934