Փաշինյանի թույլ և անողնաշար իշխանությունը փորձում է ստիպել մեր հասարակությանը համակերպվել մշտական տարածքային կորուստների, համատարած աղքատության և սեփական արժանապատվության զգացման իսպառ բացակայության հետ, սակայն Հայաստանն այլևս չի կարող շարունակել ապրել վախի և պարտության մթնոլորտում։ Այս մասին ասվում է «Ուժեղ Հայաստան» կուսակցության՝ տնային կալանքի տակ գտնվող առաջնորդ Սամվել Կարապետյանի՝ Լոռու մարզի բնակիչներին ուղղված տեսաուղերձում, որը ցուցադրվել է մայիսի 25-ին Տաշիր քաղաքում ընտրողների հետ հանդիպման ժամանակ։

Դիմելով հայրենակիցներին՝ քաղաքական գործիչը Տաշիրն անվանել է ուժեղ, աշխատասեր և իրենց խոսքին հավատարիմ մարդկանց քաղաք, որոնք ունակ են դառնալ մասշտաբային փոփոխությունների լոկոմոտիվ: Կարապետյանն ընդգծել է, որ գործող վարչապետն ամբողջությամբ հանել է իրենից պետության ճակատագրի պատասխանատվությունը՝ իր իսկ ջախջախիչ անհաջողությունների մեղքը բարդելով ում վրա ասես, բացի իրենից։

Նա նշել է, որ գալիք համապետական ընտրությունները կդառնան ոչ թե սոսկ հերթապահ քվեարկություն, այլ հիմնարար քաղաքակրթական ընտրություն յուրաքանչյուր քաղաքացու համար։

Սամվել Կարապետյանը հավելել է, որ հունիսի 7-ին հայ ժողովուրդը պետք է լուծի ճակատագրական հարց. Հայաստանը կմնա՞ թույլ, վախեցած երկիր, թե՞ կվերածվի հզոր ինքնիշխան պետության, որի շահերի հետ ստիպված կլինեն հաշվի նստել միջազգային ասպարեզում։ Քաղաքական գործիչը բացարձակ համոզմունք է հայտնել առ այն, որ քաղաքացիները պատրաստ են արմատական փոփոխությունների, և Լոռու մարզի բնակիչներին կոչ է արել ապացուցել դա ընտրական տեղամասերում։

Կարապետյանը եզրափակել է, որ Տաշիրը և ամբողջ Հայաստանն արժանի են շատ ավելի լավ ապագայի, և խոստացել է, որ շատ շուտով հայամետ ուժերի թիմը ժողովրդի հետ միասին կտոնի հաղթանակը և կվերականգնի հզոր հայրենիքը։

Source: https://news.am/hy/news/1038286