Ինձ ոչ ոք չի ուղարկել, ես նույնիսկ չեմ կարող նման պրոցես պատկերացնել։ Այս մասին հայտնել է տնային կալանքի տակ գտնվող, «Ուժեղ Հայաստան» կուսակցությունից վարչապետի թեկնածու, գործարար և բարերար Սամվել Կարապետյանը՝ հայկական լրատվամիջոցների խմբագիրների խմբի հետ հանդիպման ժամանակ։

«Չկա այնպիսի մարդ կամ ուժ, որ կարողանա ինձ ստիպել անել այն, ինչ ես չեմ ուզում։ Աշխարհում չկա այնպիսի բիզնես, որի համար ես Հայաստանի շահերը կդնեի հարվածի տակ։ Ի՞նչ կարող են անել, խլել իմ բիզնե՞սը։ Փաշինյանն էլ փորձեց դա անել, իր ոտքին գցեց։ Նրանք էլ կգցեն։ Վստահ եմ, որ նման բան չի լինի, բայց եթե լինի, ի՞նչ անել։ Քանի որ ես որոշել եմ կյանքս նվիրել Հայաստանի զարգացմանը, այդպես էլ կլինի։ Ինձ ոչ ոք չի ուղարկել, ես նույնիսկ չեմ կարող նման գործընթաց պատկերացնել։

Ես կասկածում եմ, որ Փաշինյանն իրենց ամենաանիմաստ գործակալն է։ Տեղյակ չեմ, պարզապես ենթադրում եմ։ Նրա քայլերը… գուցե ոչ թե ԱԴԾ-ի գործակալ է, այլ Ադրբեջանի կամ Ֆիդանի գործակալ։ Բայց այն ամենը, ինչ նա անում է հայրենիքի նկատմամբ, նորմալ մարդու քայլեր չեն կարող լինել։ Փաշինյանն ինձ ստիպեց այդպես վարվել՝ հարձակվելով եկեղեցու վրա։ Բայց հստակ է, որ ՌԴ-ում ինձ հետ այդ թեմայով ոչ մի անգամ խոսակցություն չի եղել։ Եթե նման բան լիներ, Փաշինյանը չէր համարձակվի ինձ 5 ամիս ամենածանր պայմաններում պահել ԿԳԲ-ի նկուղներում», - նշել է Կարապետյանը։

Պատասխանելով այն հարցին, թե արդյոք իշխանությունները արտահոսքերի միջոցով չեն ծրագրում հող նախապատրաստել, որպեսզի Կարապետյանին չեզոքացնեն ընտրական գործընթացներից, քաղաքական գործիչը նկատել է, որ նման բան չի բացառվում, կամ ուժային կառույցները արջի ծառայություն են մատուցում Փաշինյանին։ Նրա խոսքով՝ «Ուժեղ Հայաստանի» շարքերում հազարավոր ակտիվիստների մեջ կարող են լինել ներթափանցված անձինք, նրանց էլ ձայնագրում են և ցուցադրաբար կալանավորում, բայց նրանց մեղավորության վերաբերյալ դատարանի ոչ մի որոշում չկա։

Կարապետյանի գնահատմամբ՝ իշխանությունները պատրաստ են իրենց ցանկացած ապօրինի քայլին։ «Բայց որքան էլ անուղեղ լինեն, չեն ուզենա լինել ոչ լեգիտիմ իշխանություն, իսկ այդպես կդառնան ոչ լեգիտիմ, ժողովուրդը դա թույլ չի տա։ Ինչպե՞ս կարող են իշխանությունը պահել բնակչության քառորդի աջակցությամբ, դա վտանգավոր կդառնա նրանց համար ոչ միայն որպես իշխանություն, այլ անձամբ յուրաքանչյուրի համար։ Եթե գործընթաց սկսվի, մենք չենք կարող մեկնաբանել, թե այն ինչպես կավարտվի, աշխարհում շատ օրինակներ կան», - զգուշացրել է քաղաքական գործիչը։

Source: https://news.am/hy/news/1037502