Հունիսին Չինաստանի Ժողովրդական Հանրապետությունում կմեկնարկի Երևանի պատմության թանգարանի հերթական միջազգային ցուցահանդեսը, որը կանցկացվի երկրի միանգամից երեք տարբեր նահանգներում։ Նախագիծն իրականացվում է «Հայաստանի մշակույթի օրերը Չինաստանում» ծրագրի շրջանակում և նպատակ ունի չինացի այցելուներին ծանոթացնել Հայաստանի հարուստ պատմամշակութային ժառանգությանը։

Կազմակերպիչների խոսքով՝ այս տարվա նախագիծը նախորդներից կտարբերվի ինչպես ցուցանմուշների քանակով, այնպես էլ թեմատիկ բազմազանությամբ։ Չինաստան կուղարկվի Երևանի պատմության թանգարանի մեծ հավաքածու՝ բաղկացած 134 ցուցանմուշից։ Դրանում կընդգրկվեն հայկական գորգեր, արծաթագործության նմուշներ, ասեղնագործության օրինակներ, ինչպես նաև ավանդական կենցաղին և արհեստագործական արվեստին առնչվող արժեքավոր առարկաներ։

«Հայ-չինական գործընկերության կենտրոն» հասարակական կազմակերպության նախագահ Արմեն Մխիթարյանը նշել է, որ Չինաստանում հայկական մշակույթի նկատմամբ հետաքրքրությունը տարեցտարի աճում է։

«Այս տարի մենք նախատեսում ենք Չինաստան բերել Երևանի պատմության թանգարանի մեծ հավաքածու՝ այն ցուցադրելու Չինաստանի երեք նահանգային թանգարաններում։ Հավաքածուն բաղկացած կլինի 134 առարկայից՝ ներառյալ գորգեր, արծաթագործական իրեր, ասեղնագործություն և հայկական ավանդական մշակույթը ներկայացնող տարբեր ցուցանմուշներ։ Նախորդ տարիներին հավաքածուն մեծ հետաքրքրություն է առաջացրել ցուցահանդեսների այցելուների շրջանում, և այս տարի այն արդեն ընդլայնված կազմով մեկ տարի ժամկետով կներկայացվի Չինաստանի թանգարաններում», — հայտարարել է Արմեն Մխիթարյանը։

Նրա խոսքով՝ արվեստով հետաքրքրվող չինացի հանրությունը մեծ հետաքրքրություն է ցուցաբերում տարբեր ժողովուրդների, այդ թվում՝ հայ ժողովրդի, պատմական և ավանդական մշակույթի նկատմամբ։

«Չին ժողովուրդը մեծ հետաքրքրություն է ցուցաբերում պատմական և ավանդական մշակույթի նկատմամբ՝ թե՛ հայկական, թե՛ այլ ժողովուրդների։ Հայկական մշակույթի նկատմամբ առանձնահատուկ հետաքրքրություն նկատելի էր նախորդ ցուցահանդեսների ընթացքում, որոնք այցելել են մոտ երկու միլիոն մարդ։ Այս հաջողությունից ոգեշնչված՝ մենք որոշեցինք հայկական մշակույթն ու արհեստագործական արտադրանքը ներկայացնել նաև Չինաստանի այլ նահանգներում։ Մենք կարծում ենք, որ ընդլայնված ցուցադրությունը կներգրավի ավելի մեծ լսարան և այցելուների ավելի մեծ թիվ», — ընդգծել է նա։

Երևանի պատմության թանգարանի գիտական գծով փոխտնօրեն Լուսինե Ամիրջանյանը հիշեցրել է, որ թանգարանն արդեն մի քանի տարի ակտիվորեն համագործակցում է Չինաստանի տարբեր քաղաքների թանգարանների հետ։

«Սա, իհարկե, մեր առաջին ցուցահանդեսը չէ։ Մենք արդեն մի քանի տարի համագործակցում ենք Չինաստանի բազմաթիվ քաղաքների թանգարանների հետ, և մեզ մեծ աջակցություն է ցուցաբերում Հայ-չինական գործընկերության կենտրոնը՝ ի դեմս Արմեն Մխիթարյանի։ Այս համագործակցության շնորհիվ այս տարի մենք կրկին հնարավորություն ստացանք մասնակցելու Չինաստանի երեք քաղաքներում կազմակերպվող ցուցահանդեսներին», — նշել է Լուսինե Ամիրջանյանը։

Նա ընդգծել է, որ Չինաստանում հայկական մշակույթը ներկայացնելը Երևանի պատմության թանգարանի համար մեծ պատիվ և պատասխանատվություն է։

«Չինաստանն արդեն դարձել է մեզ համար շատ հարազատ երկիր։ Աշխարհի ամենահզոր մշակույթներից մեկ ունեցող և հսկայական բնակչությամբ պետությունում Երևանի պատմությունը ներկայացնելը մեզ համար մեծ պատիվ և հպարտություն է», — ասել է նա։

Թանգարանի փոխտնօրենի խոսքով՝ եթե նախորդ ցուցահանդեսներում հիմնական շեշտը դրվում էր ազգագրական նյութերի վրա, ապա այս տարի այցելուներին կներկայացվեն նաև արժեքավոր հնագիտական ցուցանմուշներ։

«Նախորդ տարիներին մենք հիմնականում ներկայացնում էինք Երևանի պատմության թանգարանի ազգագրական հավաքածուն, սակայն այս տարի որոշեցինք ցուցադրել նաև հնագիտական նյութեր։ Մենք ձգտում ենք ներկայացնել ոչ միայն ազգագրական և հնագիտական ցուցանմուշները, այլև ամբողջ պատմությունը՝ իր քաղաքական, պատմական և մշակութային ասպեկտներով, որպեսզի ստեղծենք Հայաստանի և Երևանի անցյալի մասին հնարավորինս ամբողջական պատկերացում», — նշել է Լուսինե Ամիրջանյանը։

Կազմակերպիչների գնահատմամբ՝ ցուցահանդեսը կդառնա ոչ միայն կարևոր մշակութային իրադարձություն, այլև նոր խթան՝ հայ-չինական մշակութային համագործակցության խորացման համար։

Source: https://news.am/hy/news/1038014