«Անկախ դիտորդը» հանդես է եկել հայտարարությամբ՝ հորդորելով իշխանություններին Երևանի գինու փառատոնը չանցկացնել հունիսի 6-ին և 7-ին։

Հայտարարությունում ասվում է. «Հունիսի 5-7 Երևանում անցկացվելու են Երևանի գինու օրեր ամենամյա փառատոնը։ Գիտակցելով, որ միջոցառումն ամենամյա է և մասնավոր նախաձեռնություն է, Անկախ դիտորդն այնուամենայնիվ մտահոգիչ է համարում, որ փառատոնի անցկացման երկու օրերը համապատասխանում են լռության օրվան և քվեարկության օրվան։

Ակնհայտ է, որ այսպիսի մասշտաբային միջոցառումը չի կարող զերծ մնալ, թե քարոզչական միջոցառումներից, թե անվտանգության ուժերի կենտրոնացումից և կխաթարի նաև քվեարկությունը այն տեղամասային կենտրոններում, որոնք գտնվում են նախատեսված միջոցառման մոտակայքում։

Անկախ դիտորդը հորդորում է միջոցառման կազմակերպիչներին և Երևանի համայնքապետարանին վերանայել միջոցառման ժամկետները այնպես, որ հունիսի 6-ին և 7-ին ապահովվեն ընտրական օրենսգրքով նախատեսված սահմանափակումները»։

Հիշեցնենք, որ խորհրդարանական ընտրությունները տեղի են ունենալու հունիսի 7–ին։

Source: https://news.am/hy/news/1038581