ՀՀ արտգործնախարար Արարատ Միրզոյանը չի բացառել օբյեկտիվ բաղադրիչի առկայությունը դեպի ՌԴ հայկական արտադրանքի ներմուծման արգելքի հարցում։

ԱՄՆ պետքարտուղար Ռուբիոյի՝ Երևան կատարած այցից հետո անցկացված մամուլի ասուլիսում նախարարը, պատասխանելով ՌԴ մի շարք ապրանքատեսակների ներմուծման արգելքի մասին հարցին, հայտարարել է, որ Հայաստանը չի ցանկանում լարվածություն մտցնել ՌԴ-ի հետ հարաբերություններում ո՛չ երկկողմ, ո՛չ էլ բազմակողմ ձևաչափով, այլ հակառակը՝ ցանկանում է կարգավորել առաջացող բոլոր հարցերն առողջ, կառուցողական մթնոլորտում։ Կատարվածը լարված հարաբերություններին, Հայաստանի եվրոպամետ քաղաքականությանը կամ նույնիսկ ընտրություններին վերագրելու փորձերը նախարարը կտրականապես հերքում է և պնդում, որ նման արգելքներ կիրառվել են նաև 5-10-15 կամ 25 տարի առաջ։

«Ահա, ասում են՝ ալկոհոլի արգելք։ Արգելքը դրված է ոչ թե ամբողջ գինու արտադրանքի վրա, այլ մեկ ընկերության արտադրանքի մի մասի։ Իսկ ինչո՞ւ եք բացառում, որ խնդիրները կարող են օբյեկտիվ լինել»,- հայտարարել է Միրզոյանը՝ նկատելով, որ արտադրողն էլ երբեմն կարող է անբարեխիղճ լինել։ Միաժամանակ նա մատնանշել է ինչպես մատակարարման աղբյուրների, այնպես էլ իրացման շուկայի դիվերսիֆիկացման անհրաժեշտությունը։

Source: https://news.am/hy/news/1038608