Հայաստանի ՆԳՆ-ում քաղաքացիություն ստանալու դիմումների թվի աճը հակված են կապել ռուս-ուկրաինական հակամարտության հետ։
Օգոստոսի 14-ին առաջին կիսամյակի արդյունքներին նվիրված մամուլի ասուլիսի ժամանակ գերատեսչության փոխղեկավար Արմեն Ղազարյանը հայտնել է, որ ՌԴ-ից հայերի դիմումների թվի աճը նախորդ տարի հասել է պատմական առավելագույնի՝ ավելի քան 32 հազար։ Նախորդ 2 տարիների ընթացքում ցուցանիշը պահպանվել է 20 հազարից ավելի մակարդակում, իսկ ավելի վաղ կազմել է 7-8 հազար։
Ղազարյանի կարծիքով՝ դիմումների թվի աճը կապված է ՌԴ քաղաքացիների համար գործող սահմանափակումների հետ։ «Ստացվում է, որ քաղաքացիությունը օգտագործվում է որպես գործիք՝ ճանապարհորդելու հնարավորություն ստանալու համար», - նշել է Ղազարյանը։ Նա հիշեցրել է, որ օրենսդրությունը հայերի համար պահանջներ չի առաջադրում։ «Գուցե կան ինչ-որ վարչական խոչընդոտներ, բայց պետության կողմից պահանջներ չկան։ Ըստ էության, դրանք չկան։ Իմ մասնագիտական կարծիքով՝ սա խնդիր է, և այն անհրաժեշտ է լուծել։ Հարցը քաղաքացիության ինստիտուտի արժեքն է», - ընդգծել է Ղազարյանը՝ հավելելով, որ այս առումով կներկայացվի օրենսդրական փոփոխությունների նախագիծ։ Նա նաև անտրամաբանական է համարել այն, որ քաղաքացիությունից հրաժարված անձը կարող է անմիջապես դիմել այն կրկին ստանալու համար։
Ինչ վերաբերում է քաղաքացիությունից հրաժարվելուն, Ղազարյանը հակված է հրաժարումների մեծ մասը կապել անչափահասների քաղաքացիության հետ՝ ակնհայտորեն նկատի ունենալով զինվորական ծառայությունը։ Օրենսդրության համաձայն՝ անչափահասը կարող է դադարեցնել քաղաքացիությունը, եթե ծնողներից մեկը դադարեցրել է այն։ Այս հարցը նույնպես անհրաժեշտ է լուծել, նշել է Ղազարյանը։
Source: https://news.am/hy/news/1055433