Մեր գործարարներն այսօր բախվել են այնպիսի խնդիրների, որոնք Հայաստանի նորագույն պատմության մեջ դեռ երբևէ չեն եղել, իսկ գործող իշխանությունը բացարձակապես ոչինչ չի անում։ Դրա մասին մայիսի 29-ին Կոտայքի մարզի Աբովյան քաղաքում ընտրողների հետ հանդիպման ժամանակ հայտարարել է «Ուժեղ Հայաստան» կուսակցությունների դաշինքի անդամ, փաստաբան Արամ Վարդևանյանը։

Քաղաքական գործիչը հավաքվածների ուշադրությունը հրավիրել է այն փաստի վրա, որ հսկայական թվով քաղաքացիներ այսօր պետական խնամքի և պաշտպանության խիստ կարիք ունեն, սակայն երկրի գործող ղեկավարությունը լիակատար անգործություն է ցուցաբերում։ Ըստ Վարդևանյանի՝ սեփական ժողովրդի և պետության հանդեպ իրական սերը ապացուցվում է գործով, իրական արդյունքներով, աղքատության վերացմամբ և բարեկեցության ստեղծմամբ, այլ ոչ թե դատարկ խոսքերով։

Որպես ներկայիս կուրսի այլընտրանք՝ «Ուժեղ Հայաստան» դաշինքի անդամն օրինակ է բերել «Տաշիր» ընկերությունների խմբի ղեկավար Սամվել Կարապետյանին՝ նշելով, որ նման ղեկավարության դեպքում վերաբերմունքը ազգային բիզնեսի նկատմամբ սկզբունքորեն այլ կլիներ։

«Եթե այս անձանց փոխարեն Հայաստանի գլխին կանգնած լիներ Սամվել Կարապետյանն ու իր թիմը, ապա մեր գործարարի մոտ թեկուզ մեկ խնդիր առաջանալու դեպքում՝ նրանք ամբողջ աշխարհը շուռ կտային, բայց կլուծեին իրենց քաղաքացու, բարեկեցություն ստեղծող իրենց գործարարի հարցը»,- ընդգծել է Արամ Վարդևանյանը՝ հավելելով, որ հենց այդ պատճառով էլ եկել է փոփոխությունների ժամանակը, որոնք կապված են լինելու Կարապետյանի անվան հետ։

Անդրադառնալով վերջին հինգ տարիների արդյունքների գնահատմանը՝ քաղաքական գործիչը քաղաքացիներին հիշեցրել է 2021 թվականի իշխանությունների նախընտրական խոստումները, երբ հայտարարվում էր Հայաստանի և Արցախի երաշխավորված ապագայի մասին։ Գործնականում, սակայն, ինչպես փաստել է Վարդևանյանը, այսօր Արցախում ոչ մի հայ չի մնացել, իսկ բուն Հայաստանը, հենց հիմա տարբեր ուղղություններով բախվում է բռնազավթմանը, ինչը հանրության շրջանում հիմնավորված տագնապ է առաջացնում աճող սպառնալիքների պարագայում։

Իր ելույթի վերջում Արամ Վարդևանյանը հունիսի 7-ին անցկացվելիք ընտրություններն անվանել է ճակատագրական՝ դրանք բնութագրելով որպես կոշտ ընտրություն «ավերողների և արարողների», ինչպես նաև եկեղեցին քանդողների և այն կառուցողների միջև։ Հիշեցնելով կառավարող «ՔՊ» կուսակցության ծրագրային դրույթները, որոնք ենթադրում են միջամտություն եկեղեցու գործերին, քաղաքական գործիչը ընտրողներին կոչ է արել քվեարկել համար 3 քվեաթերթիկի օգտին։

«Հա՛յ ժողովուրդ, մի՛ հանիր քո խաչը և տե՛ր կանգնիր քո եկեղեցուն»,- եզրափակել է Վարդևանյանը՝ աբովյանցիներին համախմբման կոչ անելով հանուն փոփոխությունների։

Source: https://news.am/hy/news/1039482