Ոչ թե ընտրել «կամ-կամ», այլ պետք է ընտրել «և-և»-ի բանաձևը և վարել հավասարակշռված քաղաքականություն՝ գումար վաստակելով մեզ քաջ հայտնի ռուսական հսկայական շուկայում, որտեղ մեզ հարմարավետ զգալու հարցում օգնում է նաև մեծ սփյուռքը, իսկ ցանկության դեպքում այդ գումարները ծախսել Եվրոպայում՝ Փարիզում կամ Բրյուսելում։ Այս մասին ռուսական «ՌԲԿ» հեռուստաալիքին տված հարցազրույցում հայտարարել է Հայաստանի երկրորդ նախագահ Ռոբերտ Քոչարյանը, որը գլխավորում է «Հայաստան» դաշինքի պատգամավորության թեկնածուների համամասնական ցուցակը։

Պատասխանելով այն հարցին, թե ընտրություններում հաղթելու դեպքում իր դաշինքն ինչ է նախատեսում փոխել երկրում, նա ընդգծել է, որ արտաքին քաղաքական կուրսը բոլորովին այլ է լինելու։ Միևնույն ժամանակ, Քոչարյանը հատուկ նշել է, որ իրենք դեմ չեն Ռուսաստանի հետ հարաբերություններին, այլ ընդհակառակը՝ համոզված են, որ դրանք է՛լ ավելի կբարելավեն։ Նրա խոսքով՝ փոքր երկիրը չպետք է սրի ուժային մեծ կենտրոնների միջև եղած հակասությունները կամ խաղա դրանց վրա, այլ պետք է արձանագրի իր ներկայությունն այնտեղ, որտեղ այդ հակասությունները հարթվում են, ինչպես դա արվում էր իր նախագահության տարիներին՝ փոխզիջումների քաղաքականության շրջանակներում։

Ռոբերտ Քոչարյանը որպես օրինակ է բերել անցյալ տարիների հարևան Վրաստանը՝ այնտեղ տեղի ունեցած գործընթացներն անվանելով «իր մղձավանջը», երբ այդ երկրի ղեկավարությունը գործում էր ճիշտ հակառակ տրամաբանությամբ։ Նախկին նախագահի գնահատմամբ՝ Վրաստանի առաջնորդը ներքաշվում էր շահերի բախման գոտիներ՝ խզելով կապերը մի կողմի հետ՝ մյուսից օգուտներ քաղելու ակնկալիքով, ինչի հետևանքով Վրաստանը լիովին կտրվեց Ռուսաստանից և շրջվեց դեպի ԱՄՆ ու Եվրամիություն։ «Եթե մարդը կոնֆլիկտային է, նա միշտ կոնֆլիկտներ է ստեղծում թե՛ ներքին քաղաքականության մեջ, թե՛ արտաքին՝ փորձելով շահել այդ կոնֆլիկտից։ Բայց կոնֆլիկտի դեպքում կարելի է շահել միայն մեկ կողմից, իսկ մյուսից՝ պարտվել», - պարզաբանել է Քոչարյանը։ Նա հավելել է, որ Հայաստանն այնքան ուժեղ ու աշխարհաքաղաքական առումով կարևոր չէ, որ իրեն թույլ տա նման ճանապարհ անցնել, ուստի իշխանությունները պետք է իրավիճակն օգտագործեն սեփական նպատակների համար, այլ ոչ թե սրեն ուրիշների վեճերը։

Քոչարյանը հիշեցրել է, որ Հայաստանն իրեն միշտ հաջողությամբ դիրքավորել է որպես մի պետություն, որն ընդունակ է օգտակար լինել կոնկրետ ոլորտներում։ Միևնույն ժամանակ, նրա կարծիքով, Երևանը երբեք չպետք է անի քայլեր, որոնք գերտերություններն ու գործընկերները կարող են ընկալել որպես սպառնալիք իրենց անվտանգությանը։ «Մեզ համար դա նշանակում է չձեռնարկել այնպիսի քայլեր, որոնք անվտանգային սպառնալիք կստեղծեն Իրանի կողմից, և որպեսզի Ռուսաստանը մեր քայլերը չընկալի որպես սպառնալիք իր սեփական անվտանգությանն ու տարածաշրջանում իր ներկայությանը», - ընդգծել է նախկին նախագահը։

Անդրադառնալով ուկրաինական հակամարտության ֆոնին Մոսկվայի ուժի ընկալմանը՝ երկրի նախկին ղեկավարը մատնանշել է համաշխարհային ասպարեզում հսկայական հնարավորություններով օժտված նոր խոշոր խաղացողի հայտնվելը, որին սեփական սահմանների մոտ անտեսելը պարզապես անհեռատեսություն է։ Ռոբերտ Քոչարյանի խոսքով՝ այս ճգնաժամը ցույց է տվել, որ այսօր օբյեկտիվորեն գոյություն ունի երեք գերտերություն՝ ԱՄՆ-ը, Չինաստանը և Ռուսաստանը, ընդ որում՝ վերջինս «ցույց տվեց, որ իր ազգային շահերի համար պատրաստ է շատ ու շատ բաների»։ Նա հավելել է, որ Հայաստանը պետք է կառուցի ճիշտ, հավասարակշռված հարաբերություններ, որոնք բխում են բացառապես երկրի սեփական շահերից, այլ ոչ թե Բրյուսելի կամ Վաշինգտոնի հրահանգներից, քանի որ խոշոր խաղացողներն ի վերջո լեզու կգտնեն միմյանց հետ, իսկ նրանք, ովքեր անկայունության շրջանում անհեռատես որոշումներ են կայացրել, կմնան ձեռնունայն։

Source: https://news.am/hy/news/1039940