Բանգլադեշում հազվագյուտ ալբինոս գոմեշը, որն իր բնորոշ բաց գույնի փուփուլի պատճառով ստացել է «Դոնալդ Թրամփ» մականունը, փրկվել է Կուրբան Բայրամի (Իդ ալ-Ադհա) տոնին զոհաբերվելուց։ Դրա մասին չորեքշաբթի հայտնել է երկրի Ներքին գործերի նախարարության ներկայացուցիչը։

Գրեթե 700 կիլոգրամ կշռող կենդանին արդեն վաճառվել էր ծիսական մորթի համար, սակայն նախարարությունը միջամտել է իրավիճակին՝ վկայակոչելով անվտանգության նկատառումները՝ բնակչության շրջանում աննախադեպ իրարանցման պատճառով։

Ներքին գործերի նախարար Սալահուդդին Ահմեդն անձամբ կարգադրել է պահպանել գոմեշի կյանքը, գնորդին վերադարձնել գումարը, իսկ «Դոնալդ Թրամփին» տեղափոխել Դաքքայի ազգային կենդանաբանական այգի, հայտնում է Reuters-ը։

«Ամենավերջին պահին որոշում ընդունվեց գոմեշին ազատել զոհաբերությունից՝ անվտանգության նկատառումներից և հանրային անսովոր մեծ հետաքրքրությունից ելնելով»,- պարզաբանել է գերատեսչության պաշտոնյան։

Այն, ինչ սկսվել էր որպես տոնին ընդառաջ անասունի սովորական գնում, ակնթարթորեն վերածվեց համազգային սենսացիայի այն բանից հետո, երբ գոմեշի մասնակցությամբ տեսանյութերը տարածվեցին համացանցում։ Մարդկանց ամբոխները սկսեցին հավաքվել ագարակում, ընդ որում շատերը երկար ճանապարհ էին անցնում միայն նրա համար, որպեսզի կենդանի տեսնեին նրա շիկահեր մազափունջը և հանգիստ բնավորությունը։

Ագարակի սեփականատեր Զիաուդդին Մրիդհան պատմել է, որ կենդանուն մականունը տվել է իր կրտսեր եղբայրը, որն առաջինն է նկատել ապշեցուցիչ նմանությունն ամերիկյան նախագահի հետ։ Մրիդհան հավելել է, որ գոմեշը բացառիկ քնքուշ է և պահանջում է հատուկ խնամք, ներառյալ՝ հաճախակի կերակրում և կանոնավոր լոգանքներ։

Ալբինոս գոմեշները սակավադեպ երևույթ են Բանգլադեշի համար, որտեղ գրեթե բոլոր անասուններն ունեն մուգ գունավորում։ Հենց դա էլ նրան դարձրեց Կուրբան Բայրամի նախօրեին վաճառքի սեզոնի գլխավոր աստղը, թեև կենդանու կյանքը, դատելով ամեն ինչից, փրկեց հենց նրա հայտնի մականունը։

Source: https://news.am/hy/news/1038917