Առաջիկա ժամանակահատվածում պետական-իրավական հարցերի մշտական խորհրդարանական հանձնաժողովի առանցքային խնդիրներից մեկը նոր Սահմանադրությանը նվիրված քննարկումների կազմակերպումն է։ Այս մասին Ազգային ժողովի նիստում, վերոնշյալ հանձնաժողովի նախագահի ընտրության հարցի քննարկման ժամանակ, օգոստոսի 11-ին հայտարարեց թափուր պաշտոնի թեկնածու, իշխող «Քաղաքացիական պայմանագիր» խմբակցության պատգամավոր Արուսյակ Ջուլակյանը։ Ժողովրդավարական լեգիտիմությունը, նրա խոսքով, պետք է ստանա լիարժեք սահմանադրական արտահայտություն։ «Մենք պետք է ունենանք Սահմանադրություն, որի իրական հեղինակը պետք է լինի ժողովուրդը։ Սահմանադրություն, որի նկատմամբ հանրային վստահությունն այլևս կասկածի տակ չի դրվի։ Սահմանադրություն, որը կդառնա համընդհանուր համաձայնության փաստաթուղթ։ Այսինքն՝ ոչ թե որևէ քաղաքական ուժի, այլ Հայաստանի Հանրապետության քաղաքացիների», - ասաց Ջուլակյանը։ Ինչպես նշեց պատգամավորը, նոր Սահմանադրությունը պետք է ամրապնդի մարդկային արժանապատվությունը՝ որպես սահմանադրական կարգի առանցքային արժեք, ավելի հստակ սահմանի պետական իշխանության սահմանները, ապահովի զսպումների և հակակշիռների արդյունավետ համակարգ, ինչպես նաև պետական կառավարման կայունություն և ժողովրդավարական վերահսկողություն։ Հանձնաժողովի մյուս առաջնահերթությունների շարքում պատգամավորը նշեց դատական իշխանության անկախության ամրապնդումը, արդարադատության մատչելիության բարձրացումը, օրենսդրության որակի բարելավումը և արդեն ընդունված օրենքների նկատմամբ հետագա խորհրդարանական վերահսկողության իրականացումը։ Նա հավաստիացրեց, որ ընտրվելու դեպքում պատրաստ է համագործակցել խորհրդարանական բոլոր խմբակցությունների և պատգամավորների հետ՝ անկախ նրանց քաղաքական հայացքներից։ «Իրավական պետության կայացումը վեր է ցանկացած կուսակցական շահերից», - եզրափակեց Ջուլակյանը։
Source: https://news.am/hy/news/1054789