Հայաստանում արժեթղթերի շուկան ակտիվացնելու առաջին քայլով վերացնելու ենք «բաց» և «փակ» բաժնետիրական ընկերությունների տարբերակումը․ ընկերությունը կա՛մ պետք է դառնա իրական բաժնետիրական ընկերություն՝ ազատ շրջանառվող բաժնետոմսերով և հաշվետվողականությամբ, կա՛մ վերակազմակերպվի ավելի պարզ իրավական ձևի՝ ՍՊԸ-ի։ Այս մասին ասել է «Միասնության թևերի» տնտեսական թիմի անդամ Դիանա Հակոբյանը։

Նա նշել է, որ բանկերը, հեռահաղորդակցության օպերատորները, էներգետիկ, հանքարդյունահանող ընկերությունները պարտադիր պետք է գործեն բաժնետիրական ընկերության ձևով, քանի որ ունեն հանրային նշանակություն, հետաքրքրություն և բարձր ազդեցություն տնտեսության վրա։ Սա նշանակում է՝ թափանցիկ հաշվետվողականություն, հստակ վերահսկողություն և հնարավորություն՝ ներդրողների մասնակցության համար։

«Որքան մեծ է ընկերության ազդեցությունը հանրության վրա, այնքան բարձր պետք է լինի նրա թափանցիկությունն ու պատասխանատվությունը»,- ասել է տնտեսագետը։

Source: https://news.am/hy/news/1037796